Neft, qaz, alternativ enerji sahəsində uğurla həyata keçirilən strategiya Azərbaycanın Avropa bazarlarında etibarlı təchizatçı mövqeyini gücləndirməyə imkan verib və enerji sahəsində diversifikasiya ölkəmizin gələcəkdə mövqeyinin daha da möhkəmlənməsinə xidmət edəcək.
Bunu Ölkə.Az-a açıqlamasında Milli Məclisin VI çağırış deputatı İltizam Yusifov Bakıda keçirilən Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarını şərh edərkən deyib.
Onun sözlərinə görə, həyata keçirilən strategiya ölkənin enerji sektorunda köklü dəyişikliklər yaratmaqla yanaşı, Azərbaycanın dünya enerji bazarında mövqeyini möhkəmləndirib. “Azərbaycan ilk olaraq, neft strategiyasını həyata keçirməklə dünya enerji bazarında mövqeyini möhkəmləndir. Onun ardınca qaz strategiyası həyata keçirməklə enerji siyasətini diversifikasiya etməklə Avropa bazarlarında etibarlı təchizatçı mövqeyini gücləndirdirdi. Növbəti mərhələdə isə enerji sahəsini diversifikasiya istiqamətlərini genişləndirib alternativ enerji strategiyasını reallaşdırmaqla Avropanın enerji bazarında etibarlı ciddi oyunçu rolunda çıxış etməyi qarşısına hədəf qoyub. Bu məqsədə də nail olunacaq. Azərbaycan bu məqsədinə nail olmaq üçün təkcə özünün deyil, eyni zamanda bütövlükdə Cənubi Qafqazın və Mərkəzi Asiyanın da potensialından faydalanmaq niyyətindədir. Bu istiqamətdə də siyasətini həyata keçirməkdədir”, - o qeyd edib.
İ. Yusifov əlavə edib ki, Azərbaycanın yürütdüyü uğurlu enerji strategiyası geniş mənada Avropanın enerji təhlükəsizliyini təmin etməklə yanaşı, Cənubi Qafqaz və Mərkəzi Asiya bölgəsinin iqtisadi inkişafına və regionlararası sıx əməkdaşlıq formatının yaranmasına xidmət edir.
O bildirib ki, istər Cənub Qaz Dəhlizi, istərsə də Xəzər-Qara Dəniz Yaşıl Enerji Dəhlizi layihəsi ölkənin regional enerji tranziti və logistika qovşağı kimi strateji mövqeyini möhkəmləndirməklə yanaşı, Avropa ilə Asiya arasında etibarlı enerji körpüsü rolunu gücləndirmək, xarici investisiyaların cəlb olunmasına, ölkənin enerji təhlükəsizliyini təmin edərək iqtisadi inkişafını sürətləndirmək baxımından mühüm əhəmiyyət kəsb edir.
“Bununla da Azərbaycan enerji təhlükəsizliyi ilə bağlı mürəkkəb reallıqlar fonunda balanslaşdırmaya, şaxələndirməyə təbii qaz və bərpa olunan enerjiyə bərabərhüquqlu yanaşmasına əsaslanan siyasəti öz bəhrəsini verir. Cənub Qaz Dəhlizi ilə başlayan Məşvərət Şurası hazırda yaşıl enerji dəhlizləri təşəbbüsləri üzrə genişmiqyaslı əməkdaşlığın mərkəzinə çevrilir. Azərbaycanın təşəbbüsü ilə yaşıl enerji sahəsində “Xəzər - Qara Dəniz - Avropa”, “Mərkəzi Asiya - Azərbaycan”, “Azərbaycan - Türkiyə - Avropa”, “Azərbaycan - Gürcüstan - Türkiyə - Bolqarıstan” kimi yaşıl enerji dəhlizi layihələrinin reallaşdırılması istiqamətində işlər gedir”, -Yusifov qeyd edib.
İ. Yusifov həmçinin əlavə edib ki, bu strateji enerji layihəsi təkcə Azərbaycanın bərpa olunan enerji potensialının inkişafını nəzərdə tutmur, eyni zamanda Avropanın enerji təhlükəsizliyinə və yaşıl enerji keçidinə mühüm töhfə verir: “Nəticədə həyata keçirilən siyasət nəticəsində Azərbaycan Aİ-nin enerji şəbəkəsinə inteqrasiyasını gücləndirəcək və yaşıl enerji tədarük zəncirini daha da möhkəmləndirəcək. Bu, Azərbaycanın enerji strategiyasında yeni mərhələ olacaq. Cənab prezident İlham Əliyevin toplantıda bəyan etdiyi kimi, bu gün heç vaxt olmadığı qədər enerji təhlükəsizliyi milli təhlükəsizliyin, ölkələrin təhlükəsizliyinin ayrılmaz bir hissəsidir. Azərbaycanla enerji əlaqələrinin inkişafı Avropa ilə iqtisadi əməkdaşlığın inkişafını, daha davamlı və təhlükəsiz enerji gələcəyinə keçidi sürətləndirəcək. Bu baxımdan da Azərbaycanın həyata keçirdiyi çoxşaxəli enerji strategiyası mühüm geosiyasi əhəmiyyət kəsb edir.
Nəticə olaraq onu qeyd etmək olar ki, bütün bunlar Azərbaycanın beynəlxalq enerji bazarındakı rolunu gücləndirəcək, Avropa üçün alternativ enerji mənbələrinə çıxış imkanlarını artıracaq və Xəzər - Qara Dəniz regionunun enerji tranziti üçün yeni imkanlar yaradacaq”.
