Ölkə başçısı İlham Əliyev cənablarının işğaldan azad olunmuş ərazilərdə apardığı quruculuq və abadlıq işləri yüksək sürət və keyfiyyətlə davam etdirilir. Tikilən evlər, salınan ağıllı kəndlər, bərpa olunan infrastruktur yaxın zamanlarda bu ərazilərin sakinlərin ixtiyarına veriləcəyindən xəbər verir.
Cəbrayıl , Qubadlı və Zəngilan rayonlarında Prezidentin Xüsusi Nümayəndəliyinin bu ərazilərdə gördüyü işlər və sakinlərlə apardığı mütəmadi görüşlər rayon əhalisi tərəfindən yüksək qiymətləndirilir və rəğbətlə qarşılanır.
Gündəmtv.az xəbər verir ki, Qubadlı rayonunun Tatar, Qaraqoyunlu və Qiyaslı kəndlərində şəhid məzarlarının bərpası yönündə Cəbrayıl, Qubadlı və Zəngilan rayonlarında Prezidentin Xüsusi Nümayəndəliyinin bu təşəbbüsə qoşulması və kənd sakinlərinin dəstəyi ilə görülən işlər müvəffəqiyyətlə yekunlaşmaq üzrədir.
Qubadlı rayonunun Tatar, Qaraqoyunlu və Qiyaslı İcmasının Mətbuat Xidmətinin rəhbəri İlkin Şirinov bildirmişdir ki, erməni təcavüzkarlarına qarşı qəhrəmancasına mübarizə aparan Qubadlı rayonunun Tatar, Qaraqoyunlu və Qiyaslı kəndlərinin şəhidlərinin fotoşəkillərindən ibarət lövhə kəndin girəcəyinə vurulmuş, məzarları bu kəndlərdə olan şəhidlərdən biri Etibar Cəfərovun erməni vandalları tərəfindən dağıdılmış, məzarı bərpa olunmuş, digər şəhid polis mayoru Fəxrəddin Piriyevin məzarının bərpası istiqamətində işlər davam etdirilir. Ən qürurverici məqamsa şəhid məzarlarının bərpası zamanı ANAMA əməkdaşlarının kənd sakinləri ilə birgə bu işdə yaxından iştirak etməsi olub.
Hər zaman dövlətin qayğısını hiss edən Qubadlı rayonunun Tatar, Qaraqoyunlu və Qiyaslı İcmasının nümayəndələri Azərbaycan Respublikasının Prezidenti İllham Əliyev cənablarına təşəkkürlərini bildirib və Cəbrayıl , Qubadlı və Zəngilan rayonlarında Prezidentin Xüsusi Nümayəndəliyinin işini yüksək qiymətləndiriblər.
