Azərbaycan və Meksika iqtisadi, eləcə də investisiya əlaqələrinin inkişafı üçün səylərini aktivləşdirirlər.
"Gündəmtv.az" xəbər verir ki, bu barədə Azərbaycanın Meksikadakı səfiri Məmməd Talıbov “Canal6” telekanalına müsahibəsində bildirib.
Onun sözlərinə görə, Bakı və Mexiko arasında artıq mədəniyyət, turizm və iqlim gündəliyi sahəsində sıx əməkdaşlıq qurulub.
"Meksika Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) fəal iştirak edib. Hazırda biz iqtisadi və investisiya əlaqələrimizə yeni təkan verə biləcək layihələr və imkanlar axtarışına diqqət yetiririk. Artıq mədəniyyət və turizm sahəsində sıx əməkdaşlıq edirik, lakin daha konkret addımlar atmaq üçün yollar axtarırıq. Çünki əməkdaşlığı inkişaf etdirmək üçün bir çox istiqamətlər mövcuddur", - diplomat qeyd edib.
Səfir Mərkəzi Asiya bazarlarına çıxmaq istəyən Meksika şirkətləri üçün Azərbaycanın hab rolu oynaya biləcəyinə dair sualın cavabında vurğulayıb ki, ölkəmiz son 25-30 il ərzində əhəmiyyətli dərəcədə dəyişib: "Genişmiqyaslı iqtisadi təşəbbüslər sayəsində Azərbaycan regionun enerji və nəqliyyat xəritəsini dəyişdirməyi bacarıb. Bizim inkişaf etmiş infrastrukturumuz, yüksək təhlükəsizlik səviyyəmiz var. Ölkədə Meksika səfirliyinin mövcudluğunu da qeyd etmək lazımdır. Bütün bu amillər Meksika iqtisadiyyatının şaxələndirilməsini dəstəkləmək üçün möhkəm əsas yaradır".
