Xəbər verdiyimiz kimi, avqustun 2-də Türkiyədə İnstaqram bağlanıb. Sosial media platformasının bloklanması nəticəsində Türkiyənin ziyanı 3 gündə 6 milyard lirəyə (304 milyon 200 min manat) yaxınlaşıb.
Bəs Türkiyədə İnstaqram nə zaman açılacaq? İnstaqramın bağlanması ən çox hansı sahələrə təsir edir?

Məsələ ilə bağlı Bakupost.az –a açıqlama verən iqtisadçı ekspert Natiq Cəfərli bildirib ki, İnstaqramın bloklanması Türkiyədə ciddi narazılığa səbəb olub.
“Bütün dünyada olduğu kimi Türkiyədə də İnstaqram daha çox ticarətin və xidmət sahəsinin genişləndirilməsi, reklam üçün istifadə edilə biləcək ən uyğun platformalardan biridir. Sözügedən qərar Türkiyədə kiçik və orta sahibkarların ciddi narazılığına səbəb olub. Çünki İnstaqram üzərindən reklam vermək daha asan, daha ucuz başa gəlir. Bu yolla daha çox auditoriyaya çatmaq mümkündür”, - Natiq Cəfərli vurğulayıb.
Ekspert əlavə edib ki, yaxın günlərdə məsələ həllini tapacaq:
“Düşünmürəm ki, uzun müddət belə davam edəcək. Türkiyə ilə İnstaqram rəsmiləri arasında danışıqlar aparılır. Yaxın günlərdə məsələ həllini tapacaq. Çünki instaqram da 85 milyonluq bir ölkədə öz reklam bazarını itirmək istəməz. İnstaqram Türkiyədə kifayət qədər ciddi pul qazanır. Əsas ziyan bu platformada+- reklam verən hesablı müştərilərə, kiçik və orta sahibkarlara, istehsal və xidmət sahəsində çalışanlara dəyir”.
Xatırladaq ki, Türkiyənin İnformasiya Texnologiyaları və Rabitə İdarəsi bloklanmanın instaqramın qoyduğu qadağalar arasında yer alan çoxsaylı cinayət paylaşımları ilə bağlı şərtlərə əməl edilməməsi ilə əlaqəli olduğunu açıqlayıb.
Nəqliyyat və infrastruktur naziri Abdulkadir Uraloğlu instaqrama giriş qadağasını “İnstaqrama cinayət paylaşımları ilə bağlı xəbərdarlıq etdik, lakin lazımi cavabı ala bilmədiyimiz üçün giriş bloku tətbiq etdik” - deyə əsaslandırıb.