Alyaskada keçirilən tarixi sammit öncəsi maraqlı anlar yaşanıb. ABŞ Hərbi Hava Qüvvələrinin F-22 “Raptor” tipli beşinci nəsil qırıcıları Rusiya Prezidenti Vladimir Putini daşıyan təyyarəni ABŞ hava məkanına daxil olduğu andan etibarən müşayiət edib.

Gündəm24.az xəbər verir ki, yayılan görüntülərdə Rusiya liderinin xüsusi reysi ətrafında ABŞ qırıcılarının təhlükəsizlik dəhlizi yaratdığı aydın şəkildə görünür. Bu addım həm protokol, həm də təhlükəsizlik baxımından zəruri hesab edilib.

Mütəxəssislərin fikrincə, belə müşayiət beynəlxalq protokolda xüsusi önəm daşıyır. ABŞ bu yolla həm öz hava məkanında təhlükəsizlik tədbirlərinin ən yüksək səviyyədə həyata keçirildiyini göstərir, həm də görüşün əhəmiyyətini simvolik şəkildə vurğulayır.

Qeyd edək ki, Putinin Alyaskaya səfəri Donald Tramp ilə danışıqlar üçün baş tutub. Tərəflər məhdud tərkibdə və daha sonra nümayəndə heyətlərinin iştirakı ilə bir neçə saatlıq görüş keçiriblər. Görüşün əsas mövzusu Ukraynadakı münaqişənin həlli və yeni təhlükəsizlik sazişləri olub.

Səmra İSMAYIL,
Gündəm24.az

Oxunub: 50