"Azad edilmiş ərazilərdə kənd təsərrüfatının bərpası diqqət mərkəzindədir. Bu sahədə yeni dəstək mexanizmlərinin formalaşdırılması və tətbiqi qarşıya vəzifə kimi qoyulub. Azad edilmiş ərazilərdə kənd təsərrüfatlı təyinatlı 4,7 min hektar ərazi ayrı-ayrı subyektlərə icarəyə verilib”.
Gündəmtv.Az xəbər verir ki, bunu kənd təsərrüfatı nazirinin müavini İlhamə Qədimova Milli Məclisdə "Aqrar sektorda sahibkarlığa dəstək: nəticələr və perspektivlər" mövzusunda keçirilən ictimai dinləmələr zamanı deyib.
Eyni zamanda nazir müavini qeyd edib ki, işğaldan azad edilmiş ərazilərdə müasir suvarma sisteminin tətbiqi geniş vüsət alıb: “2021-ci ildən etibarən azad edilmiş ərazilərdə fermerlərin yaylaqlara mövsümü köçü başlayıb. 2024-cü ildə Şərqi Zəngəzurda və Qarabağ iqtisadi rayonları üzrə 1022 fermerə məxsus 249 min 996 xırdabuynuzlu davar, eyni zamanda 10 min 49 baş iribuynuzlu mal-qara və 4 min 217 fermerə məxsus 195 min 203 arı ailəsi qeydiyyatdan keçib.
Nazir müavini əlavə edib ki, aqrar sahədə fəaliyyət göstərən subyektlərə Zəngilan rayonunda 2 min 220 hektar, Qubadlı rayonunda 2 min hektar ərazi üzrə kənd təsərrüfatı təyinatlı torpaq uzunmüddətli icarəyə verilib: “2024 və 2025-ci təsərrüfat ili üçün 60 min 789 hektar əkin sahəsi üzrə qısamüddətli icarə müqavilələri bağlanıb”.
