İranda siyasi mübarizə yeni mərhələyə qədəm qoyur. Ölkənin sabiq xarici işlər naziri Məhəmməd Cavad Zərif “Foreign Policy” jurnalında dərc olunan məqaləsində “Paradigmanın dəyişmə zamanı yetişib” adlı manifestlə çıxış edib. O, İranın Almaniya, Fransa və Böyük Britaniya ilə – yəni Avrotroyka ilə – nüvə proqramı ətrafında danışıqlara oturmasının vacibliyini vurğulayıb. Zərifin fikrincə, Tehran ölkəni “daimi təhdidlər paradiqmasından imkanlardan istifadə paradiqmasına” keçirməlidir.

Gündəm24.az xəbər verir ki, Avrotroyka İrana avqustun sonuna qədər möhlət verib. Əks halda, sanksiyaların bərpası və hərbi zərbələrin endirilməsi ehtimalı gündəmə gələ bilər. Bu isə danışıqların nəticəsindən və İran daxilindəki əsas siyasi klanların mövqeyindən birbaşa asılıdır.

Siyasi analitiklərin qənaətinə görə, Zərifin bu məqaləsi İranda islahatçılarla mühafizəkarlar arasında artan qarşıdurmanı açıq şəkildə əks etdirir. Onlar bildirirlər ki, nüvə məsələsi ətrafında qərar yalnız İranın xarici siyasətini deyil, həm də ölkənin daxili güc balansını müəyyənləşdirəcək.

Mütəxəssislər hesab edirlər ki, əgər Tehran Avrotroyka ilə dialoqa üstünlük versə, yeni diplomatik imkanlar açıla bilər. Əks halda, həm iqtisadi, həm də təhlükəsizlik baxımından ölkə daha ağır nəticələrlə üzləşə bilər.

Səmra İsmayıl,
Gündəm24

Oxunub: 18