Türkiyə Milli Kəşfiyyat Akademiyasının İsrail və İran arasında 12 günlük müharibə ilə bağlı sensasion hesabatı diqqət çəkib.

Gündəm24.az xəbər verir ki, ötən həftə dərc olunan sənəddə Ankaranın hərtərəfli tədbirlər görməsinin vacibliyi vurğulanır.

Dərin hərbi modernləşdirmədən tutmuş, yeni milli təhlükəsizlik arxitekturasının formalaşmasına qədər bütün məsələlərdən danışılır.

“12 günlük müharibə və Türkiyə üçün dərs” başlıqlı hesabatda qeyd olunur ki, İsrail və İran silahlı münaqişədən sınaq meydançası kimi istifadə edib.

Türkiyə Kəşfiyyatı müasir müharibənin hibrid xarakter daşıdığını vurğulayır. İsrail gündəlik rəqəmsal platformaları, o cümlədən WhatsApp messencerini hücum vasitəsinə çevirərək Tehranın mərkəzində yüksək rütbəli komandirləri aradan qaldırmağa nail olub.

İrana qarşı istifadə edilən texnologiyalar Türkiyə üçün də təhlükə yaradır. Çünki İslam Respublikası ciddi itkilərə məruz qalıb. Bir çox beynəlxalq İT şirkətləri və proqram təminatı istehsalçılarının İsraillə sıx əlaqələri olduğunu nəzərə alaraq, sənəddə bu cür texnologiyaların Türkiyənin strateji obyektlərinə çatmasının qarşısının alınmasının vacibliyi barədə xəbərdarlıq edilir.

Strateji obyektlərdə WhatsApp-ın təhlükəsi nədir?

Qeyd edilir ki, son iki onillikdə müdafiə sektoruna irimiqyaslı investisiyaların qoyulmasına baxmayaraq, müəyyən zəif tərəflər hələ də qalmaqdadır. 2016-cı ildən Türkiyə yüzlərlə “Anka” və “Bayraktar TB2” tipli hücum pilotsuz uçan aparatları istehsal edib ki, bu da Ukrayna, Liviya, Suriya və Qarabağdakı münaqişələrdə güc balansını dəyişdirərək ölkəni döyüş pilotsuz təyyarələri sahəsində dünya liderlərindən birinə çevirib. 2028-ci ilə qədər 783 min kvadrat kilometr ərazidə Türkiyə hava məkanını bütün yüksəkliklərdə təhlükələrdən qoruya bilən beşinci nəsil “Kaan” qırıcısının və milli çoxlaylı “Polad günbəz” hava hücumundan müdafiə sisteminin seriyalı istehsalına başlamağı planlaşdırır. Eyni zamanda, Hərbi Hava Qüvvələrinin F-16 qırıcıları əsasında yaradılan hazırkı donanması sürətlə köhnəlir.

Hesabat ordusu 300-ə qədər təyyarədən, "F-16" və "F-35", PUA və tanker təyyarələrindən bir əməliyyatda istifadə etmək iqtidarında olan İsrailin hava üstünlüyü vyurğulanır. Hərbi Hava Qüvvələrinin modernləşdirilməsi, pilotsuz sistemlərin inteqrasiyası zərurətinə xüsusi diqqət yetirilir. Müharibə göstərdi ki, çoxqatlı və hərtərəfli hava hücumundan müdafiə sistemi mütləq zərurətdir.

Ayrı-ayrılıqda qeyd olunur ki, İsrail hətta müttəfiqlərinin geniş dəstəyi ilə də İranın atdığı müasir hipersəs raketlərini tam zərərsizləşdirmək iqtidarında deyil. Bu baxımdan Ankaraya öz ballistik və hipersəs silahlarının kütləvi istehsalına başlamaq tövsiyə olunur.

Türkiyə Milli istihbarat Təşkilatı (MİT) da İranı potensial təhlükə hesab edir. Hesabatda deyilir ki, Türkiyə İranın nüvə proqramı, raket imkanları və geniş müttəfiq silahlı qruplar şəbəkəsi ilə mübarizə aparmaq üçün hazırlıqlı olmalıdır.

İran isə Türkiyənin düşməni elan edilir

Sənəd həmçinin İranın proksi qüvvələrinin İraqdakı Türkiyə bazalarına keçmiş hücumlarına işarə edir və belə hərəkətlərin təkrarlanmayacağına dair heç bir zəmanətin olmadığını vurğulayır.

Məlumat üçün bildirək ki, Türkiyənin hazırkı xarici işlər naziri Hakan Fidanın təşəbbüsü ilə 2023-cü ildə Milli Kəşfiyyat Təşkilatının tərkibində yaradılan MİT Akademiyası kəşfiyyat, təhlükəsizlik və strategiya sahələrində kadrlar hazırlayır, həmçinin milli və beynəlxalq təhlükəsizlik sahəsində tədqiqatlar aparır.

Aliyə Ələsgər
gundemtv.az

Oxunub: 744