İranın “Tahlil Bazaar” nəşri Zəngəzur dəhlizinin açılması ilə bağlı yayımladığı məqalədə Azərbaycan və Ermənistan arasında əldə olunmuş razılaşmanı qərəzli şəkildə təqdim edib.

Gündəm24.az xəbər verir ki, nəşrin iddiasına görə, İrəvanın dəhlizə razılıq verməsi İranın milli maraqlarına ziddir və layihə ABŞ-nin geosiyasi rıçaqlarından birinə çevrilir.

Məqalədə qeyd edilir ki, Orta Dəhliz Çinin “Bir kəmər, bir yol” təşəbbüsünün mühüm marşrutlarından biridir. Lakin dəhlizin Xəzər üzərindən keçməsi, onun Rusiya və İrandan keçən şimal və cənub xətləri qədər geniş imkanlara sahib olmasına mane olur.

Bununla yanaşı, Tehran dəhlizin iqtisadi və strateji əhəmiyyətini qiymətləndirməkdə səhvə yol verməkdə ittiham edilir. Bildirilir ki, sanksiyalar nəticəsində tranzit imkanlarından kənarlaşdırılan İran yeni regional aktorların meydana çıxması ilə Orta Dəhlizin inkişafında kənarda qalıb.

Nəşr həmçinin Zəngəzur dəhlizinin Ermənistan üçün faydalarını xüsusi vurğulayır. Qeyd olunur ki, bu layihə Ermənistanı Xəzər və Qara dənizlərə daha da yaxınlaşdıraraq beynəlxalq tranzit marşrutlarının bir hissəsinə çevirəcək.

Tehran isə əks mövqe sərgiləyərək, dəhlizin regional təhlükəsizlik üçün təhdid olduğunu bildirir. İranın narahatlığı əsasən öz tranzit imkanlarının kəskin şəkildə məhdudlaşacağı və layihənin strateji maraqlarına zidd olması ilə əsaslandırılır.

Səmra İSMAYIL,
Gündəm24.az

Oxunub: 95