Gündəm24.az xəbər verir ki, Qərbi Azərbaycan İcmasının Sumqayıt nümayəndəliyində millət vəkili Səbinə Salmanovanın təşəbbüsü ilə gənclər və ziyalılarla 8 Avqust Tarixi Görüş və Sülh Bəyannaməsinin əhəmiyyətinə həsr olunmuş görüş keçirilib.
İlk öncə Ümummilli Lider Heydər Əliyevin və Vətən uğrunda canını fəda etmiş şəhidlərin ruhu bir dəqiqəlik sükutla yad edilib.
Tədbiri açan nümayəndəliyin sədri Ramiz İsmayılov çıxışında 8 Avqust 2025-ci il tarixində Vaşinqtonda imzalanmış Sülh Bəyannaməsinin region üçün tarixi əhəmiyyətini vurğulayıb. O, sənədin Cənubi Qafqazda dayanıqlı sülhün təmin olunması, dövlətlərarası münasibətlərin normallaşdırılması və Zəngəzur dəhlizinin açılması baxımından strateji rol oynadığını qeyd edib. Ramiz İsmayılov icma üzvlərini bu tarixi prosesin əhəmiyyətini gənc nəsillərə çatdırmağa çağırıb və sülhün qorunmasında hər kəsin aktiv rol oynamasının vacibliyini diqqətə çatdırıb.
Millət vəkili Səbinə Salmanova çıxışında Prezident İlham Əliyevin uzaqgörən siyasəti nəticəsində əldə olunmuş bu tarixi nailiyyətin milli maraqlara və regionda sabitliyin təmin olunmasına böyük töhfə verdiyini bildirib. O, Zəngəzur dəhlizinin Azərbaycanın geosiyasi mövqeyini gücləndirəcəyini və iqtisadi imkanlarını artıracağını vurğulayıb. Həmçinin, millət vəkili gəncləri aktiv iştirak etməyə və regionun inkişafında fəal rol almağa çağırıb. Vurğulanıb ki, Prezidentin uzaqgörən siyasəti nəticəsində imzalanmış Sülh Bəyannaməsi Azərbaycan üçün tarixi nailiyyət hesab olunur və Zəngəzur dəhlizinin açılmasına böyük töhfə verir.
Nümayəndəliyin Ağsaqqallar Şurasının sədri Əbülfəz Əbilov çıxışında Sülh Bəyannaməsinin Azərbaycan üçün tarixi əhəmiyyətini diqqətə çatdırıb. O, bəyannamənin yalnız diplomatik sənəd olmadığını, həm də regionda sabitliyi təmin edən strateji addım olduğunu vurğulayıb.
Nümayəndəliyin sədr müavini İlkin Şirinov çıxışında gənclərin roluna toxunub. O, bu tarixi mərhələdə gənclərin aktiv vətəndaş mövqeyi göstərməsinin vacibliyini qeyd edib və Zəngəzur dəhlizinin açılmasının region üçün yaratdığı yeni imkanlardan danışıb.
Daha sonra çıxış edən nümayəndəliyin İdarə heyətinin üzvü Akif Şahbazov vurğulayıb ki, Sülh Bəyannaməsi və Zəngəzur dəhlizinin açılması Qərbi Azərbaycana qayıdış imkanlarını və regionda təhlükəsizliyi artırır. Bu sənəd həm diplomatik baxımdan, həm də gənc nəsillərin vətənə bağlılığının möhkəmləndirilməsində strateji əhəmiyyət kəsb edir. Prezident İlham Əliyevin rəhbərliyi ilə həyata keçirilən bu təşəbbüslər Qərbi Azərbaycana tarixi ədalətin bərpasına töhfə verir. Sülh Bəyannaməsinin sosial və iqtisadi faydalarını diqqətə çatdıraraq bildirib ki, regionlararası əlaqələrin möhkəmlənməsi və ticarət imkanlarının artmasına şərait yaradacaq.
Nümayəndəliyin üzvü Nazim Hikmətov çıxışında tarixi və mədəni aspektləri ön plana çıxarıb. O, Sülh Bəyannaməsinin Azərbaycanın mədəni irsinin qorunmasına və bölgədə uzunmüddətli sabitliyin təmin olunmasına töhfə verdiyini qeyd edib.
Sonra çıxış edən Şəhid Rüfət Əhmədlinin anası, filoloq Ruhiyyə Əhmədova ölkəmizin qazandığı bu tarixi nailiyyəti dəyərləndirib və gənclərin vətənpərvərlik ruhundan danışıb. Qeyd edib ki, hər bir Azərbaycan vətəndaşı həyata keçirdiyi taleh yüklü məsələlərdə ölkə başçısının yanında olmalıdır.
Nümayəndəliyin gənclər şurasının üzvləri çıxış edərək Sülh Bəyannaməsinin gənclərə yaratdığı imkanlardan danışıb. Onlar Zəngəzur dəhlizinin açılmasının regionun iqtisadi və sosial inkişafına töhfə verəcəyini və gənclərin aktiv iştirakı ilə yeni layihələrin həyata keçiriləcəyini qeyd ediblər.
Tədbir iştirakçıları mövzu ilə bağlı fikir mübadiləsi aparıb, Sülh Bəyannaməsinin yaratdığı yeni imkanlar və gələcək layihələr barədə müzakirələr aparıblar.

Oxunub: 480