“Bu yay daşınmaz əmlakın bütün növlərinin bahalaşması ilə qarşılaşırıq. Bu da təbii prosesdir, Azərbaycanda iqtisadi inkişaf gedir, 30 ildən artıq işğal altında qalan torpaqlar artıq azad edilib və həmin ərazilərdə bərpa-quruculuq işlərinə start verilib. Bütün bunlar təbii ki, daşınmaz əmlaka olan marağı və diqqəti artırıb”.
Bu sözləri Yenisabah.az-a Azərbaycan Qiymətləndiricilər Cəmiyyətinin (AQC) sədri, əmlak məsələləri üzrə ekspert Vüqar Oruc deyib.
O, Bakıətrafı qəsəbələrdə yerləşən bağ evlərinin qiymətlərinin ötən illə müqayisədə xeyli artdığını qeyd edib və bunun səbəblərini izah edib:
“Bağ evlərinə maraq xeyli artıb. Eyni zamanda, Rusiya və Ukrayna arasında gedən müharibə nəticəsində həmin ölkələrdə yaşayan, öz biznesi olan soydaşlarımız diqqətlərini daha çox öz ölkəmizə yönəltdilər və öz bizneslərinin Azərbaycanda davam etdirilməsi üçün addımlar atdılar. Onlar müşahidə etdilər ki, daşınmaz əmlaka investisiya etmək daha əlverişlidir. Belə ki, banklar ildə 7-8 faiz divident verir, lakin daşınmaz əmlak hər il ən azı 10-15 faiz artıma məruz qalır, bu da onu göstərir ki, daşınmaz əmlaka qoyulan investisiya cazibədardır. Biznesmenlər bunun ən az riskli olan sahə olduğunu anladılar və daşınmaz əmlaklara investisiya yatırmağa başladılar, bu da bu sahədə olan artımların başlıca səbəblərindən biridir.
Artıq bu proses dönməz xarakter alır, biz artıq qiymət artımını nəinki hər il, hər ay müşahidə edirik.
Abşeron yarımadasında, Bakı ətrafında bağ evlərinə diqqət artıb. Bağ evlərinin hər il qiymətinin artması artıq faktdır. Qardaş ölkə Türkiyədə baş vermiş zəlzələ də bağ evərinə marağı artırdı. Belə ki, həmin evlər daha az təhlükəlidir və baş verəcək hər hansı fövqəladə hal qarşısında insanların sağlamlığının qorunması üçün daha məqsədə müvafiqdir. Bağ evlərinin qiymətinin kəskin artmasında bu nüans müstəsna rol oynadı”.
V.Oruc qeyd edib ki, hazırda bağ evləri daha çox biznes məqsədilə alınıb-satılır:
“Biznes sahəsi kimi bağ evlərindən istifadə daha aktualdır. Hazırda quru sərhədlər bağlıdır, insanlar istirahət üçün bağ evlərinə daha çox üstünlük verirlər, xüsusilə hovuzlu, idman meydançası, zalı olan bağ evləri hazırda yüksək qiymətə kirayə verilir.
Bu, həmin evlərdən əldə edilən gəliri daha da artırır. Ötən illə müqayisədə bu il bağ evlərinə tələbat daha da artıb, bu da birbaşa qiymət artımına səbəb olur. Böyük ehtimalla, bu vəziyyət gələn il də belə olacaq.
Hazırda bağ evləri biznes sahəsi kimi qəbul olunur”.
