İranın Məsləhət Şurasının üzvü Seyid Məhəmməd Sədr bəyan edib ki, iyun ayında baş verən 12 günlük müharibə zamanı Rusiya İsrailə İranın hava hücumundan müdafiə sistemlərinin yerləşdirilməsi barədə kəşfiyyat məlumatları verib.

Onun sözlərinə görə, Moskva ilə “strateji ittifaq faydasızdır”. Sədr “Kommersant”ın istinad etdiyi Synergyir kanalına müsahibəsində qeyd edib ki, Rusiya yalnız formal olaraq İsrailin hücumlarını qınayıb, əslində isə ona yardım göstərib. O, həmçinin Rusiyanın S-400 sistemlərini Türkiyəyə satmasını da həqiqi strateji tərəfdaşlığın olmamasına sübut kimi göstərib.

gundemtv.az xəbər verir ki, Sədr münasibətlərin saxlanmasının vacib olduğunu, lakin Moskvanın etibarlı müttəfiq sayıla bilməyəcəyini vurğulayıb. Bu fonda diqqətçəkən məqam ondan ibarətdir ki, müharibə dövründə bəzi pro-rus mənbələr ittihamları Azərbaycana yönəltməyə çalışır, Bakını İsrailə dəstəkdə günahlandırırdılar. İndi isə bunun sadəcə diqqəti yayındırmaq və məsuliyyəti Azərbaycan üzərinə atmaq üçün planlaşdırılmış kampaniya olduğu üzə çıxır.

Bundan öncə İranın Ali Milli Təhlükəsizlik Şurasının katibi Əli Laricani də bu iddiaları rədd etmiş, Azərbaycanın İsrailə yardım etdiyinə dair heç bir sübutun olmadığını bildirmişdi. O, Bakının açıqlamalarının da İrana qarşı düşmənçilik mövqeyinin mövcud olmadığını təsdiqlədiyini vurğulamışdı.

Əli Səfərli,
gundemtv.az

Oxunub: 154