"Prezident İlham Əliyev ADA Universitetində keçirilən "Yeni dünya nizamına doğru" mövzusunda keçirilən beynəlxalq forumda çıxışı zamanı Ermənistanın destruktiv siyasətinə toxunaraq revanşizm meyllərinin artdığını, İrəvanın silahlandığını və onun arxasında dayanan güclərin regiona sülhün gəlməsinə mane olduğunu qeyd etdi. Dövlət başçımızın çıxışı dünya audiotoriyalarında , o cümlədən Ermənistanda çox diqqətlə izlənilir, forumda səsləndirilən mesajlar müvafiq dairələrdə ciddi təhlil olunacaq və regionumuza sülhün gəlməsi üçün müvafiq addımlar atacaqlar".
Bunu Oxu.Az-a açıqlamasında Milli Məclisin deputatı Azər Badamov deyib.
"Dövlət başçımız Bayden administrasiyasının Azərbaycana qarşı nümayiş etdirdiyi qərəzli siyasətini, hakimiyyətin sonuna beş gün qalmış Blinkenin imzaladığı strateji tərəfdaşlıq haqqında sənədi, 907-ci düzəliş ətrafında oynanılan oyunları, Aİ-Ermənistan cütlüyünün İrəvanı silahlandırmaqla bağlı apardığı müzakirələri, Aİ-nın Sülh Fondunun, USAİD-in silahlanma üçün maliyyə ayırmasını, Fransanın himayəsini, ATƏT-in Minsk qrupunun ikili standartlı siyasətini çox ciddi tənqid edərək bütün bu hərəkətlərin Azərbaycanla Ermənistan arasında sülhün yaranmasına mane olduğunu qeyd etdi. O cümlədən Ermənistanın sürətlə silahlanması, Minsk qrupunun de-yure buraxılması və konstitusiyasında müvafiq dəyişikliklərin edilməsi istiqamətində addımların atılmaması sülhün imzlanmasına əngəl olduğunu bir daha beynəlxalq auditoriyanın diqqətinə çatdırdı. Ermənistanın dövlət rəhbərliyi reallığın necə olduğunu anlamalı və Cənubi Qafqazda sülhün və əməkdaşlığın alternativi olmadığını qəbul etməlidir", - deyə müsahibimiz vurğulayıb.
ATƏT-in Minsk qrupunun keçmiş həmsədri Metyu Brayza isə bildirib ki, Minsk qrupuna artıq ehtiyac yoxdur, çünki Azərbaycan və Ermənistan heç bir vasitəçi olmadan birbaşa danışıqlar aparırlar:
"Hər iki tərəf mümkün sülh müqaviləsi ilə bağlı müzakirələri yekun mətnə qədər gətirib çıxarıblar. Əsas əngəl Ermənistanın öz konstitusiyasını dəyişdirməsi və Qarabağın Azərbaycanın ərazisi olduğunu etiraf etməsidir. Ermənistanda bu mühüm məqam üzərində siyasi mübarizə gedir".
