“Ermənistan hakimiyyəti sülhə hazır olduğu barədə dəfələrlə səsləndirdiyi bəyanatlara baxmayaraq, yenə də təxribat xarakterli anti-Azərbaycan siyasətini davam etdirir. Belə ki, Ermənistan parlamentinin sədri Simonyan İrəvanda Cənubi Qafqaz-Avropa Parlamenti tərəfdaşlıq qrupunun sədri Nil Uşakov ilə görüşündə Qarabağla bağlı növbəti qərəzli, yalan dolu açıqlamalar verib, ölkəmizə qarşı təzyiqin göstərilməsini tələb edib”.
Gündəmtv.Az xəbər verir ki, bunu deputat Kamran Bayramov parlamentdə çıxışı zamanı deyib.
Onun sözlərinə görə, bir müddət öncə həmin Simonyan ağızdolusu Azərbaycanla sülhün bağlanması zərurətindən danışıb, tezliklə sülh müqaviləsinin imzalanmasının tərəfdarı olduğunu bildirib. “Maraqlıdır, amma təəccüblü deyil. Budur Ermənistanın xarici siyasətinin mahiyyəti”, - o qeyd edib.
O əlavə edib ki, məlum olduğu kimi, Avropa Parlamenti çoxdan Avropanın ən çox korrupsiyaya qurşanmış strukturuna çevrilib və erməni lobbisinin ciddi maliyyə və Fransa hökumətinin təşkilati dəstəyi sayəsində mütəmadi olaraq anti-Azərbaycan qətnamələri qəbul edir:
“Halbuki otuz il müddət ərzində Avropa Parlamentində azərbaycanlıların Qarabağdakı və Ermənistandakı evlərinə qayıdışının zəruriliyi ilə bağlı bir dəfə də olsun, nə bəyanat səsləndirib, nə də qətnamə qəbul edib. Ölkəmizə qarşı bu cür qərəzli münasibət Avropanın təkcə Avropa Parlamentində deyil, eyni zamanda AŞPA-da, Avropa İnsan Hüquqları Məhkəməsində və digər Avropa strukturlarında da olan ikili standartların bariz göstəricisidir.
Bu arada 30 ilə yaxın müddət ərzində torpaqlarımızı işğal altında saxlamış, xalqımıza qarşı etnik təmizləmə siyasətini həyata keçirmiş, bir milyona yaxın soydaşımızı qaçqın və məcburi köçkün vəziyyətinə saldırmış Ermənistanın xarici işlər naziri BMT-nin İnsan Hüquqları Şurasının iclasında utanmazcasına insan hüquqlarından danışıb, Azərbaycana qarşı yalan, iftira və təhrif dolu bəyanatlar səsləndirib, ölkəmizdə guya ərazi iddiaların olduğunu dilə gətirib, Qərbi Azərbaycan İcmasının ünvanına ittihamlar səsləndirib.
Ermənistan dərk etməlidir ki, onun beynəlxalq platformalarda tarixin zibilliyinə atılmış “Dağlıq Qarabağ” narrativini təbliğ etməsi sülhə xidmət etmir və erməni elitasında hələ də revanşist əhval-ruhiyyənin olduğunu göstərir. Əgər Ermənistan həqiqətən də davamlı və uzunmüddətli sülhə can atırsa, öz ərazisində qondarma rejimin qalıqlarının ləğv etməli, ərazi iddialarını nəzərdə tutan qanunvericiliyinə dəyişikliklər etməli, davamlı silahlanmanı dayandırmalı və sülh müqaviləsinin layihəsində razılaşdırılmamış bəndlər üzrə konstruktiv mövqeyini nümayiş etdirməlidir.
Eyni zamanda, həm Ermənistan rəhbərlərinə, həm də beynəlxalq təşkilatlara xatırlatmaq lazımdır ki, Azərbaycan öz daxili işlərinə qarışmağa imkan verməyəcək və heç nədən asılı olmayaraq öz mövqeyini və maraqlarını müdafiə edəcək”.
