Avqustun 20-sində Belarus Prezidenti Aleksandr Lukaşenko ilə İran Prezidenti Məsud Pezeşkian arasında görüş keçirilib. Bu səfərin əsas məqsədinin nə olduğu beynəlxalq dairələrdə maraq doğurur.

Mövzunu Gündəm24.az-a şərh edən politoloq Rizvan Hüseynov bildirib ki, Pezeşkianın Belarusdan öncə İrəvana səfəri təsadüfi deyil və birbaşa Zəngəzur dəhlizi məsələsi ilə bağlıdır:


“İranı narahat edən əsas məqam ABŞ-ın İrəvanla ortaq maraqları fonunda Zəngəzur yolunun açılmasıdır. Bu səbəbdən Pezeşkianın İrəvanda keçirdiyi görüşlərdə Paşinyan hökuməti Tehranı əmin etməyə çalışdı ki, dəhlizin açılması İranın maraqlarına zərər vurmur və təhlükə yaratmır”.

Politoloq hesab edir ki, Belarus səfərinin də mahiyyəti məhz regional siyasətlə bağlıdır:

“Mənə görə, İran prezidentinin Belarusdakı görüşlərinin əsas mövzusu Zəngəzur dəhlizi və ümumən Cənubi Qafqaz siyasətidir. Çox güman ki, bu müzakirələrdən sonra Lukaşenko Putinə zəng edəcək və ya Moskvaya səfər edəcək. Çünki diqqət etsək görərik ki, Pezeşkian Moskvaya getmir. O, prezident seçilməmişdən öncə antirusiya ritorikası ilə tanınırdı. İndi isə məqsəd Rusiyaya aid məsələləri Lukaşenko vasitəsilə Kremlə çatdırmaqdır”.

Rizvan Hüseynov əlavə edib ki, İranla Rusiya arasında münasibətlərin soyumasının səbəbi ötən aylarda baş verən İsrail-İran müharibəsi zamanı Moskvanın Tehrana gözlənilən dəstəyi verməməsi ilə bağlıdır:

“Tehran istədiyi hərbi-siyasi dəstəyi ala bilmədi, nəticədə münasibətlər daha da soyudu. Artıq İran nə bizim regionda, nə də daha geniş məkanda öz maraqlarını Rusiya ilə uzlaşdırmadan təmin edir. Tehran yeni regional geosiyasi reallığı qəbul etməyə hazırdır və Rusiyanı gözləmədən birbaşa region ölkələri ilə danışıqlar aparır. Bu da göstərir ki, İran həm siyasi, həm də iqtisadi maraqlarını təmin etmək üçün daha aktiv mövqe tutmağa başlayıb”.

Səmra İsmayıl,
Gündəm24.az

Oxunub: 196