Türkiyə Prezidenti Rəcəb Tayyib Ərdoğan İsrailin Dohada HƏMAS nümayəndə heyətinə qarşı həyata keçirdiyi hücuma sərt reaksiya verib. Ərdoğan bildirib ki, bu addım azğın Netanyahu hökumətinin bölgədə qarşıdurmanı və qeyri-sabitliyi dərinləşdirmək niyyətini bir daha göstərir.

gundemtv.az xəbər verir ki, Türkiyə lideri qeyd edib: “Beynəlxalq hüququn və Qətərin suverenliyinin açıq şəkildə pozulması olan bu hücum qardaş ölkə Qətərin təhlükəsizliyini və əmin-amanlığını hədəf alıb. Bu hücumu qətiyyətlə lənətləyirəm”. O həmçinin bildirib ki, Ankara Fələstin xalqının və strateji tərəfdaşı Qətərin yanında olacaq: “Türkiyə bütün imkanları ilə Fələstinli qardaşlarının və dostu olan Qətər Dövlətinin yanındadır. Terrorizmi dövlət siyasəti halına gətirənlər heç vaxt məqsədlərinə çata bilməyəcəklər”.

Ərdoğan vurğulayıb ki, İsrailin bölgəni fəlakətə sürükləyən siyasəti qarşısında Türkiyə mövqeyindən geri çəkilməyəcək: “İsrailin, özü ilə birlikdə bütün bölgəni fəlakətə sürükləməyi hədəfləyən hərəkətləri qarşısında qətiyyətli və prinsipial mövqeyimizi qoruyacaq, sülhü, beynəlxalq hüququ və Fələstin xalqının azadlığını müdafiə etməyə davam edəcəyik”.



Əli Səfərli,
gundemtv.az

Oxunub: 159