İsrailin həyata keçirdiyi “Alovlu Sammit” əməliyyatı İran oxu və radikal qrupların, ilk növbədə isə HƏMAS-ın rəhbərliyini “başsız qoymaq” strategiyasının yeni mərhələsidir.

gundemtv.az xəbər verir ki, aviazərbə Qətərin paytaxtı Dohada yerləşən HƏMAS-ın qərargahına endirilib və əsas məqsəd təşkilatın sərt mövqeyi ilə tanınan danışıqlarçılarından – Xəlil əl-Xayya və Zaher Cəbarini aradan qaldırmaq olub. Mənbələr bildirir ki, əməliyyatın hədəfi danışıqlarda ən radikal fiqurları sıradan çıxarmaq, meydanı isə kompromisə meylli şəxslərə buraxmaq idi.

Son vaxtlar HƏMAS rəhbərliyi daxilində fikir ayrılıqları müşahidə olunurdu: əl-Xayya Qəzza-Şəhər briqadasının komandiri, kompromisə daha açıq İzz əd-Din əl-Həddadla mübahisə edirdi. İndi isə məhz onun kimi şəxslərin, yaxud Türkiyədəki ikinci və üçüncü eşelon rəhbərlərinin danışıqlarda əsas rol oynaması istisna edilmir.

İsrailin məqsədlərindən biri həm də HƏMAS-a və vasitəçilərə siqnal göndərməkdir: girovların azad edilməsi və hərəkatın həm silahlı qanadının, həm də mülki aparatının Qəzzadan çıxarılması danışıqlar üçün əsas şərtdir. Əks halda İsrail dünyanın istənilən nöqtəsində HƏMAS rəhbərlərini hədəfə alacağını göstərir.

Bununla belə, əməliyyat İsrail üçün ciddi risklər daşıyır. Çünki zərbə ABŞ-ın ən yaxın tərəfdaşlarından olan və regiondakı ən böyük amerika hərbi bazasının yerləşdiyi Qətərin ərazisinə endirilib. Doğuşa görə, Qətərin sərt reaksiyası və müvəqqəti olaraq vasitəçilikdən imtina etməsi gözlənilir. Lakin müşahidəçilər istisna etmir ki, əməliyyat Vaşinqton və Doha ilə əvvəlcədən koordinasiya olunub.

Ekspertlər hesab edirlər ki, bu hücum təkcə hərbi deyil, həm də diplomatik xarakter daşıyır: İsrail danışıqların arxitekturasını dəyişməyə, prosesdən güzəştə getməyə qətiyyətlə qarşı çıxan fiqurları çıxarmağa çalışır.

Əli Səfərli,
gundemtv.az

Oxunub: 197