Aylar sonra ocağımızda yenidən ümid və sevinc dolu uşaq gülüşləri eşidildi. Atamız Cavanşir kişinin haqq dünyasına qovuşmasından sonra ilk dəfə idi ki, evimizdə bu qədər həyat və sevinc vardı. Azərbaycanın müxtəlif bölgələrindən 50-dən artıq şəhid övladı bizim evimizdə – onlara doğma olan məkanda toplaşdı.

“Yayın son günü” adlanan bu görüşdə 15 şəhid balasının doğum günü birlikdə qeyd edildi. Onların saf gülüşləri və sevinc dolu baxışları evimizin hər küncünü isidib, hüzurla doldurdu. Sanki şəhid atalarının ruhu onları bu evə yönəltmişdi – onlara bir qucaq, doğmalıq və sevgi bəxş etmək üçün.

gundemtv.az xəbər verir ki, bu sözləri "Mənim oğlum qəhrəmandır", "Mənim atam qəhrəmandır" layihələrinin rəhbəri, Prezident təqaüdçüsü, polkovnik Cəlal Qurbanov özünün sosial şəbəkə hesabında paylaşıb. Qurbanov qeyd edib ki, bu ocaqda həm dua vardı, həm təbəssüm, həm hüzün, həm də sonsuz minnətdarlıqla çırpınan qəlblər. O, bildirib ki, Azərbaycanın general şəhidi Polad Həşimovun anası Səmayə ana da görüşdə iştirak edərək şəhid balalarının sevincinə şərik olub, onları bağrına basaraq dualar edib və hədiyyələr təqdim edib. Onun varlığı o günə xüsusi bir ruh qatıb.

Bu doğum günləri, uşaq sevincləri şəhidlərə sədaqətin, vətənə borcun və xalqımızın birliyinin parlaq təzahürü idi. Balaların dilində isə bu, sanki atalarının onlara göndərdiyi bir sürpriz idi.

Allah bütün şəhidlərimizin ruhlarını şad, məkanlarını behişt etsin. Şəhidlərin bizə əmanət etdiyi balalar isə daima xoşbəxt olsunlar! Amin!

Oxunub: 53