Azərbaycanın tanınmış idman xadimi, professor Cavanşir Qurbanovun adı yeni nəşr olunan “Xızı–Bərmək mahalının ziyalıları” kitabının üz qabığında yer alması onun ailəsi və yaxınları üçün böyük qürur və fəxarət mənbəyinə çevrilib.

gundemtv.az xəbər verir ki, Cavanşir Qurbanovun oğlu, "Mənim oğlum qəhrəmandır", "Mənim atam qəhrəmandır" layihələrinin rəhbəri, Prezident təqaüdçüsü, polkovnik Cəlal Qurbanov öz sosial şəbəkə hesabında paylaşım edərək bildirib ki, kitabın üz qabığında Azərbaycanın müstəqillik rəmzi Məmmədəmin Rəsulzadə, görkəmli dramaturq Cəfər Cabbarlı, poeziyamızın səsi Mikayıl Müşfiq, ilk alim-cərrah və EA-nın ilk prezidenti Mirəsədulla Mirqasımov kimi nəhəng şəxsiyyətlərlə yanaşı, idman sahəsini təmsil edən bir ziyalı kimi atalarının yer alması ikiqat qürur doğurur.

Cəlal Qurbanov qeyd edib ki, Cavanşir müəllim ömrü boyu gördüyü işlərlə önə çıxmağı sevməyib. Amma onun insanlığı, dürüstlüyü, sədaqəti və təmkinli duruşu onu hər zaman seçilənlər sırasına yazıb. “Bu kitabda adının yaşadılması bizim üçün sadəcə bir tarixi qeyd deyil, bir nəsil borcunun yerinə yetməsi, bir insanlıq dəyərinin millət yaddaşına əmanət edilməsidir”, – deyə o vurğulayıb.

Cavanşir Qurbanov yalnız ailəmizin və nəslimizin deyil, bütöv Yasamal rayonunun və o cümlədən Dağlıların ağsaqqalı olub. Ömrünün son gününə qədər Yasamal Rayon Ağsaqqallar Şurasının sədri kimi fəaliyyət göstərməklə yanaşı, idman camiəsinin də ağsaqqalı və yol göstərəni olub.

Cəlal Qurbanov bildirib ki, ailəsi adından bu qiymətli nəşrin müəllifi Emil Cəfərova dərin təşəkkürünü bildirir: “Siz atamızın xatirəsini yaşatmaqla bizi həm kövrəltdiniz, həm də qürurlandırdınız. Uca Tanrı Sizə can sağlığı, ilham və bu müqəddəs missiyanızda davamlı uğurlar nəsib etsin!”

Qeyd edək ki, Cavanşir Qurbanovun həyat və yaradıcılığı geniş və zəngin olub. O, uzun illər idman sahəsində fəaliyyət göstərib, gənclərin tərbiyəsi və idmanın inkişafı üçün əvəzsiz xidmətlər edib. İctimaiyyət arasında hörmət və nüfuz qazanan dəyərli ziyalımız, Azərbaycanın idman və elmi ictimai həyatında öz izini qoyub.

Hazırda onun açdığı yol bir çox gənclərimiz üçün örnək və məktəbdir.

gundemtv.az

Oxunub: 459