Azərbaycanın sabiq Xarici İşlər naziri Tofiq Zülfüqarov olduqca maraqlı, sensasional məlumatlarla dolu bir məqalə qələmə alıb. O, özünün sosial media hesabında paylaşdığı həmin yazıda həm şəxsi xatirələrini, həm də Kreml daxilindəki anti-Azərbaycan yönümlü proseslərə dair mühüm məqamları açıqlayıb.

gundemtv.az həmin məqaləni Azərbaycan dilində olduğu kimi təqdim edir:

***

Deyirlər ki, Sergey Kiriyenko Cənubi Qafqaz dövlətləri ilə bağlı məsələlərə “nəzarət edir”…
Mən onunla yalnız bir dəfə Ukraynada, Krımda 1998-ci ildə görüşmüşəm. O zaman o, B. Yeltsinin əvəzinə MDB sammitinə gəlmişdi. Çox gənc idi, hətta məndən də cavan görünürdü, halbuki o dövrdə mən Azərbaycan hökumətində ən gənc nazir idim.

Xatırlayıram, biz avtomobillərin gətirilməsini gözləyirdik ki, Ukrayna Prezidenti L. Kuçmanın adından verilən qəbul mərasiminə – “Brejnev evi” adlanan iqamətgaha yollanaq. Qeyd edim ki, həmin iqamətgah İ. Stalinin bağ evindən uzaq deyildi. Ümumiyyətlə, bütün bu dövlət bağ evləri, demək olar ki, II Nikolayın “bağı” ilə eyni yol üzərində yerləşirdi… Amma L. Brejnevin bağ evinin bir maraqlı özəlliyi vardı, bunu qonaqlara da göstərirdilər – desert vaxtı sürüşkən şüşə panellər açılırdı və adam sanki özünü meşənin içində hiss edirdi. Amma bu, bir az sonra olacaqdı…

Hələ biz avtomobillərin gətirilməsini gözləyərkən, Boris Yeltsin tərəfindən defoltun dərhal ardından təyin olunmuş Rusiyanın yeni Baş naziri Sergey Kiriyenko “səhnəyə çıxdı”. O, meydana kifayət qədər şux addımlarla daxil oldu, amma tam da özünə əmin görünməyən gənc adam təsiri bağışlayırdı. Və nəsə bu məzmunlu sözlər dedi: “Rusiya nümayəndəsi artıq buradadır, gedək…”

MDB dövlət başçıları bir qədər təəccüblə ona baxdılar və adəti üzrə, sanki qeyri-rəsmi bir sualla, o yüksək toplantının ən yaşlı və nüfuzlu siması olan Prezident Heydər Əliyevin üzünə baxdılar.

Qeyd etməliyəm ki, Kiriyenkonun baş nazir təyin olunması, hətta Rusiyanın siyasi elitasında belə birmənalı qarşılanmamışdı. Xüsusilə də defoltdan sonra, hansı ki, yenə də Qərb kreditləri ilə “örtülməli” idi. Hamı maraqla həmin kreditorların təyin etdiyi adamı izləyirdi. Onu dərhal “Kinder-sürpriz” adlandırdılar. Bax bu “sürpriz” isə kifayət qədər konservativ bir mühitə gəlmişdi və özünü dərhal, olduqca qəribə şəkildə göstərməyə çalışdı…

Qısa pauzadan – gözləniləndən də uzun – sonra patriarx diqqətlə “Kinder-sürprizə” baxdı və dedi: “Dinlə, bəs sənin şaxtyorların necədir, onlar səni buraxdılarmı bura, bizim tədbirə?!” (O zaman şaxtyorlar hökumət evinin yanında “qambur” körpünün üzərində dəbilqələrlə döyür, əməkhaqlarını tələb edirdilər). Bu qeyddən sonra və həmin axşamın sonuna qədər Rusiya nümayəndə heyətinin rəhbəri susdu.

Soruşacaqsınız ki, bütün bunları niyə xatırladım? Özüm də bilmirəm, bəlkə ona görə ki, deyirlər, indi Azərbaycan haqqında böhtan yaymaqda Solovyov və Mardan kimi adamlara təlimat verən, elə həmin qocalmış Kiriyenkodur. Məlumdur ki, müdriklik yaşla gəlir, amma bəzən qocalıq təkbaşına gəlir…


Musavat.com-un arayışı: Sergey Vladilenoviç Kiriyenko 1998-ci ildə B. Yeltsin tərəfindən Rusiya Federasiyasının Baş naziri təyin edilib. Həmin vaxt cəmi 35 yaşı olduğuna görə, elə o zaman rus siyasətində ona “Kinder-sürpriz” ləqəbi verilmişdi. Lakin onun hökuməti qısaömürlü oldu və elə həmin ilin avqustunda ölkədəki maliyyə böhranı – defolt fonunda istefaya göndərildi.

2016-cı ildən etibarən Rusiya Prezident Administrasiyasında daxili siyasət idarəsinə rəhbərlik edib. Bu vəzifədə o, həm də Rusiya regionlarında seçkilərin təşkilinə, siyasi partiyaların koordinasiyasına və Kremlin informasiya siyasətinə nəzarət edən əsas şəxslərdən biri olub.

Son illərdə isə onun adı Cənubi Qafqaz və postsovet məkanında Kremlin siyasətini kurasiya edən əsas fiqurlar sırasında çəkilir. Azərbaycan əleyhinə yönəlmiş bəzi təbliğat xəttlərinin də məhz Kiriyenkonun təsiri altında formalaşdığı iddia olunur.

Qərb ölkələri, xüsusilə də ABŞ və Aİ, Ukrayna müharibəsindən sonra Kiriyenkonu sanksiya siyahılarına daxil ediblər.\\musavat.com

Oxunub: 132