Türkiyə Prezidenti Rəcəb Tayyib Ərdoğan ölkənin yeni milli hava hücumundan müdafiə sistemi “Polad Qübbə”nin təqdimat mərasimində iştirak edib.

gundemtv.az xəbər verir ki, dövlət başçısı ASELSAN şirkətinin Ankarada yeni müdafiə obyektlərinin təməlqoyma mərasimində çıxış edərək bildirib:

“‘Polad Qübbə’ sistemi ilə Türkiyə hava hücumundan müdafiə sahəsində tamamilə yeni mərhələyə qədəm qoyur. Xüsusilə bölgəmizdə mövcud təhlükəsizlik çağırışları fonunda radar və HHM sistemlərini milli imkanlarla inkişaf etdirməyən heç bir ölkə öz gələcəyindən əmin ola bilməz”.

Layihə çərçivəsində ordunun ixtiyarına 47 yeni texnika veriləcək. Bu məqsədlə 460 milyon dollar həcmində investisiya yatırılıb. Ərdoğan əlavə edib ki, milli istehsal olan “Gök Kubbe” HHM kompleksi 47 nəqliyyat vasitəsindən ibarət olacaq. Bundan başqa, orta mənzilli “Hisar” sistemi də ölkənin müdafiə potensialını daha da gücləndirəcək.

Türkiyə lideri həmçinin vurğulayıb ki, milli müdafiə sənayesində hazırlanan sistemlər dost və müttəfiq ölkələrə də təqdim olunur, bu isə diplomatiyanın səmərəliliyini artırır:

“50 il əvvəl sadəcə xəyal kimi görünən imkanları bu gün özümüz reallaşdırırıq”, – deyə Ərdoğan qeyd edib.

Prezident çıxışı zamanı 1,5 milyard dollarlıq “Oğulbəy Texnologiya Mərkəzi”nin yaradılacağını da açıqlayıb. Onun sözlərinə görə, bu layihə Türkiyə tarixində müdafiə sənayesinə edilən ən böyük birdəfəlik sərmayədir.

Əli Səfərli,
gundemtv.az

Oxunub: 90