Avstraliya hökuməti İslam Respublikasını Melburndakı sinaqoqa və Sidneydəki İsrail restoranına edilən hücumlarda iştirakda ittiham edərək, ölkədəki İran səfirini “persona-non-grata” (arzuolunmaz şəxs) elan edib.

Gündəm24.az xarici mediaya istinadən xəbər verir ki, bu barədə Avstraliyanın baş naziri Antoni Albaneze bildirib.

Onun sözlərinə görə, Avstraliya Təhlükəsizlik Kəşfiyyat Təşkilatı İran hökumətinin bu hücumları birbaşa yönləndirdiyini və ölkə ərazisində digər oxşar hücumların da təşkilinə cəhd edə biləcəyini araşdırır.

"Bu, Avstraliyada xarici bir güc tərəfindən təşkil edilmiş misli görünməmiş və təhlükəli təcavüz aktlarıdır", – deyə Baş nazir vurğulayıb.

Qərara əsasən, İranın Avstraliyadakı səfiri Əhməd Sadiqi ölkədən çıxarılacaq.

Eyni zamanda, Avstraliyanın Tehrandakı səfirliyinin fəaliyyəti də müvəqqəti olaraq dayandırılacaq.

Hadisəyə münasibət bildirən ölkənin daxili işlər naziri Kler Burke isə əlavə edib ki, SEPAH tezliklə terror təşkilatları siyahısına daxil ediləcək.

Mövlam RZALI,
Gündəm24.az

Oxunub: 44