Rusiyada hökumətin son qərarı ictimaiyyətdə ciddi rezonans doğurub. Söhbət Avropa Şurasının “İşgəncələrin və qeyri-insani və ya ləyaqəti alçaldan rəftar və cəzanın qarşısının alınması haqqında Konvensiyası”ndan imtina təşəbbüsündən gedir.

gundemtv.az xəbər verir ki, baş nazir Mixail Mişustin artıq sənədi imzalayıb və prezident Vladimir Putinə təqdim edib. Qərara əsasən, 1987-ci ildə qəbul edilən, 1996-cı ildə Rusiya tərəfindən imzalanmış konvensiya və ona əlavə protokollar ləğv olunmaq üçün Dövlət Dumasına göndəriləcək.

Mütəxəssislər hesab edirlər ki, bu addım Moskvanın yalnız beynəlxalq hüquqa deyil, həm də öz vətəndaşlarının əsas hüquqlarına qarşı açıq bir bəyanatıdır. Belə ki, işgəncələr və qeyri-insani rəftar indiyədək qanundan kənar olsa da, bu qərarla onların “legallaşma” riski yaranır. İndi sadəcə bir şəxsin “ekstremist” və ya “xarici agent” adlandırılması onun müdafiəsiz qalması üçün kifayət edə bilər.

Qeyd olunur ki, Krımın ilhaqı (2014) və Ukraynaya genişmiqyaslı hücum (2022) Rusiyanın beynəlxalq hüquq normalarından imtina prosesinin əsas mərhələləri olub. Konvensiyadan çıxmaq isə bu kursun məntiqi davamı sayılır.

Ekspertlər xəbərdarlıq edirlər ki, hüququn saxtalaşdırıldığı, qanunun isə yalnız repressiya alətinə çevrildiyi dövlət uzun müddət yaşaya bilməz. Çünki bu, yalnız xalqın inamını məhv edir və cəmiyyətin içindən dağılmasına gətirib çıxarır.

Əli Səfərli,
gundemtv.az

Oxunub: 653