İqtisadiyyat Nazirliyi yanında Dövlət Vergi Xidməti və Qarabağ Universiteti arasında əməkdaşlıq memorandumu imzalanıb.
"Gündəmtv.az" bu barədə Dövlət Vergi Xidmətinə istinadən xəbər verir.
Məlumata görə, qurumun rəhbərliyi Xankəndidə Qarabağ Universitetinin rektoru Şahin Bayramovla görüşüb. Görüşdə Universitetin mənəvi əhəmiyyəti, təhsil sahəsində mühüm mövqeyi, vergi mədəniyyətinin yüksəldilməsində potensial rolu barədə fikirlərini bölüşən O.Nəzərli Dövlət Vergi Xidmətinin təhsil müəssisələri ilə sıx əməkdaşlıq etdiyini vurğulayıb, tədrisin cəmiyyətdə vergi orqanlarının real funksiyası barədə düzgün fikirlərin formalaşdırılmasında, biznes mühitində vergi öhdəliklərinə intizamı artırmaq və vergi ödəməyin sosial-iqtisadi əhəmiyyətini aşılamaq üçün bu biliklərin gənclərə və yeniyetmələrə düzgün çatdırılmasında əhəmiyyətini qeyd edib.
Daha sonra tərəflər memorandum imzalayıb. Sənəddə təlim və elmi-tədqiqat sahələrində əməkdaşlığın qurulması, ortaq layihələrin həyata keçirilməsi, tələbələrin inkişafına yönəlmiş fəaliyyətlərin təşkili və qarşılıqlı faydalı əlaqələrin gücləndirilməsi nəzərdə tutulur. Memoranduma əsasən, tərəflər təcrübə və bilik mübadiləsi aparmaqla qarşılıqlı maraq kəsb edən sahələrdə uğurlu və faydalı əməkdaşlığın qurulmasını təmin edəcəklər.
Görüş çərçivəsində Dövlət Vergi Xidmətinin rəhbərliyi Universitetin müasir tədris infrastrukturu ilə tanış olub, müəllim və tələbə heyəti ilə görüşüb. Ş.Bayramov qonaqlara tələbələrin qəbulu ilə bağlı statistik göstəricilər barədə ətraflı məlumat verib. Rektor işğaldan azad edilmiş ərazilərdə fəaliyyət göstərməyin qürurundan bəhs edərək vurğulayıb ki, tarixi zəfər qazanıldığı torpaqlarda dövlətçilik ideyalarına sadiq gənclər yetişdirilməsi universitetin əsas prioritetlərindəndir. Ş.Bayramov Universitetin tələbələrinin hələ birinci kursdan etibarən müxtəlif elmi konfranslarda, beynəlxalq layihələrdə uğurla iştirak etdiyini diqqətə çatdırıb. O, qeyd edib ki, universitetin rəhbərliyi gənclərin regionun tələbatına uyğun yüksək ixtisaslı kadrlar kimi yetişdirilməsi istiqamətində Dövlət Vergi Xidmətinin timsalında müxtəlif təşkilat və qurumlarla faydalı əməkdaşlıqda maraqlıdır.
O.Nəzərli yüksəkixtisaslı kadr tələbatının ödənilməsi və tarixən mövcud olmuş təhsil ənənələrinin yaşadılmasında Universitetin əhəmiyyətini vurğulayıb. O, bildirib ki, bu tədris ocağının təsis edilməsi dövlətimizin işğaldan azad olunmuş ərazilərdə təhsilə dəstəyinin ifadəsidir. Bu addımlar bölgədə təhsil ənənələrinin bərpasına, gənclərin təhsilə olan marağının artmasına və regionun inkişafına təkan verir. O.Nəzərli görüş iştirakçılarına ölkəmizdə vergi inzibatçılığının inkişaf prioritetləri, vergi orqanlarının fəaliyyəti, “Dövlət Vergi Xidmətinin 2025-2028-ci illər üzrə Strategiyası”, tədrisə yanaşmalar və peşəkar səriştələrin artırılması istiqamətində tədbirlər barədə ətraflı məlumat verib. Qeyd edib ki, cəmiyyətdə vergi intizamının yüksəldilməsində maarifləndirmə işinin mühüm rolu var və bu baxımdan, Universitetlə əməkdaşlıq müstəsna əhəmiyyət kəsb edir. Görüş iştirakçılarına, həmçinin, Dövlət Vergi Xidmətində təcrübə keçmək və işə qəbul imkanları barədə məlumat verilib. Vurğulanıb ki, bu imkanlar tələbələrin vergi sahəsində praktiki təcrübə qazanmasına, eləcə də gələcəkdə ixtisaslı kadr kimi formalaşmasına şərait yaradır. Xidmət bu istiqamətdə gənclərin inkişafına xüsusi önəm verir.
