Dmitri Medvedevin Fransa Prezidenti Emmanuel Makronu “hinlər kralı” adlandırması Rusiyanın Fransa və bütövlükdə Qərbə münasibətində hansı mesajı verir?

Bu suala Gündəm24.az-a şərhində politoloq Elçin Xalidbəyli aydınlıq gətirib.

Onun sözlərinə görə, Fransa ümumilikdə Qərbdə Rusiyaya qarşı ən sərt və radikal mövqe tutan dövlətlər sırasındadır. Prezident Emmanuel Makron Rusiya ilə sona qədər mübarizə aparmağın, Ukraynanı dəstəkləyərək Moskvanı məğlub vəziyyətə salmağın tərəfdarı kimi çıxış edir.

Məhz bu səbəbdən də vaxtaşırı Rusiyanın siyasi dairələrindən Fransaya və onun prezidentinə qarşı çox sərt, hətta təhqiramiz ittihamlar səslənir. Son dəfə Vaşinqton görüşündə də Fransa Rusiyaya çıxış yolu verilməməsinin tərəfdarı kimi mövqeyini ortaya qoyub. Görüşdən sonrakı məsləhətləşmələrdə Makronun Rusiyanın növbəti mərhələdə Avropanı hədəfə alacağını və buna görə də Moskvanın daha sərt şəkildə sıxışdırılmasının vacibliyini vurğuladığı bildirilir.

Təbii ki, bu mövqelər Kremldə ciddi qıcıq doğurur. Çünki Fransa da daxil olmaqla Böyük Britaniya və Almaniya Ukraynaya dəstəyin əsas dayaqlarıdır. Rusiyanın tam təzyiq altında saxlanılması ssenarisinin əsas müəllifləri kimi də məhz bu dövlətlər görünür. Ona görə də Moskvanın bu ölkələrə, xüsusilə Fransaya münasibəti olduqca kəskindir.

Kremldə hesab olunur ki, Avropa Birliyi ölkələri, o cümlədən Böyük Britaniya, Almaniya və Fransa Trampın başladığı sülh prosesini əngəlləməyə çalışırlar. Halbuki əsas problem Rusiyanın öz mövqeyindədir. Moskva danışıqlarda yalnız birtərəfli şərtlər irəli sürür, qarşı tərəfi dinləmək istəmir və özünün “sülh” tələblərinin qəbul edilməsini istəyir.

Amma Rusiyanın irəli sürdüyü şərtlər qarşı tərəf üçün faktiki olaraq kapitulyasiya aktı xarakteri daşıyır. Ona görə də bu şərtlərin qəbul edilməməsi təbiidir. Beləliklə, əslində sülh prosesini pozan tərəf elə Moskvanın özüdür.

Politoloq vurğulayıb ki, bu vəziyyət Rusiyanın Fransaya və ümumən Qərbə açıq qarşıdurma mesajı verdiyini göstərir. Bu, Ukrayna savaşının davam edəcəyinə dair ciddi siqnaldır. Eyni zamanda yaxın dövrdə Fransa və Qərbin bəzi dövlətləri ilə Moskva arasındakı münasibətlərin gərgin olaraq qalacağı aydın görünür.

Hazırda proseslər Rusiyanın xeyrinə inkişaf etmir. Buna görə də Kreml elitasını təmsil edən şəxslər, o cümlədən Dmitri Medvedev, aqressiv və təhqiramiz ifadələrlə Qərb dövlətlərini, xüsusilə də Fransanı hədəfə almaqda davam edirlər.



Əli Səfərli,
gundemtv.az

Oxunub: 235