Ermənistan Azərbaycanın tarixi torpaqlarında dini və mədəni abidələri sistematik şəkildə məhv edib.
Gündəmtv.az xəbər verir ki, bu barədə Azərbaycanlı politoloq Fuad Axundov 10 aprel tarixində Müqəddəs Taxt-Tacın Vatikan Qriqorian Pontifik Universitetində keçirilən "Azərbaycanda xristianlıq: tarix və indiki zaman" mövzusuna həsr olunmuş Qafqaz Albaniyasının irsinə dair 12-ci Beynəlxalq Elmi Konfrans çərçivəsində çıxışı zamanı bildirib.
"Azərbaycanın xristian irsinin bir hissəsini təşkil edən alban kilsələri məqsədyönlü şəkildə məhv edilən abidələr sırasında olub. Qarabağda yerləşən Qafqaz Albaniyasına məxsus abidələr dağıdılıb, salamat qalanlarına isə saxtalaşdırma yolu ilə müdaxilə edilərək, onların görkəmi dəyişdirilməyə, guya erməni mənşəli kimi təqdim olunmağa çalışılıb. Bu cür əməllər təkcə Azərbaycanın tarixi və mədəni irsinə qarşı vandalizm deyil, eyni zamanda, regionun həqiqi tarixini təhrif etməyə yönəlmiş anti-xristian siyasətin təzahürüdür", - deyə Axundov vurğulayıb.
Axundov öz məruzəsində, həmçinin, bəzi beynəlxalq dairələrdə yayılmış Ermənistanla Azərbaycan arasındakı münaqişənin guya dini xarakter daşıması barədə iddiaları da təkzib edib.
Onun sözlərinə görə, bu cür yanaşma tarixi faktlardan və müasir erməni dövlətçiliyinin ideoloji əsaslarından diqqəti yayındırmaqla reallığı təhrif edir. Əslində isə, Axundovun təqdimatında qeyd edildiyi kimi, Ermənistan xristian dəyərlərinə zidd olan və əksinə, anti-xristian mahiyyət daşıyan xüsusiyyətləri getdikcə daha çox nümayiş etdirir.
Axundov çıxışında, həmçinin, Ermənistanda qəhrəmanlaşdırılan Qaregin Njdenin şəxsiyyətinə də diqqət çəkib.
Politoloqun sözlərinə görə, yaxşı sənədləşdirilmiş şəkildə nasist Almaniyası ilə əməkdaşlıq etdiyi bilinən Njdenin abidəsi İrəvanın mərkəzində ucaldılıb.
"Həvari Pavel yazırdı: "Artıq Yəhudi ilə Yunan, qulla azad, kişi ilə qadın arasında fərq yoxdur. Çünki hamınız Məsih İsada birsini". Njdenin təbliğ etdiyi "Tsexakron" adlı millətçi ideologiya bu xristian çağırışı ilə tamamilə ziddiyyət təşkil edir. Belə bir şəxsin milli qəhrəman kimi təqdim olunması Ermənistanın xristian kimliyi barədə iddialarını ciddi şəkildə şübhə altına alır", - deyə Axundov vurğulayıb.
O, eyni zamanda, birinci Ermənistan prezidenti Levon Ter-Petrosyanın 1993-cü ildə "Erkrapa" qanunsuz silahlı birləşməsinin iştirakçıları ilə keçirdiyi görüş zamanı dediklərini xatırladıb. Həmin vaxt Ter-Petrosyan azərbaycanlıların Ermənistandan qovulmasını "erməni xalqının çox köhnə arzusu" olduğunu bildirmiş və döyüşçüləri Ağdamın işğalı münasibətilə təbrik etmişdi.
Ekspert, həmçinin, Rusiya diplomatı Aleksandr Qriboyedovun 1828-ci ilə aid arxiv sənədlərindən, xüsusilə də ermənilərin İrandan Cənubi Qafqaza köçürülməsi ilə bağlı yazdığı memoranduma istinad edib. Həmin sənəddə Qriboyedov yazırdı: "Köçürülənlər müsəlmanları sıxışdırırlar, onlar isə narazılıq edir və hiddətlənirlər".
Fuad Axundovun sözlərinə görə, ermənilərin regiona aqressiv şəkildə köçürülməsinin nəticələri hələ iki əsr əvvəl sənədləşdirilmişdi.
Axundovun məruzəsində azərbaycanlılara qarşı hazırkı Ermənistan ərazisində həyata keçirilmiş təcavüzün demoqrafik nəticələrinə də xüsusi diqqət yetirilib. "Erməni tədqiqatçısı K.Korkodyanın məlumatına və rəsmi statistikalara əsasən, 1916-cı ildə İrəvan quberniyasında 373 582 azərbaycanlı yaşayırdı. Lakin 1920-ci ilin sonuna yaxın bu say cəmi 10 000 nəfərə qədər enmişdi".
1918-1920-ci illər ərzində 130 minə yaxın azərbaycanlı öldürülüb, daha 240 000 öz evlərini tərk etmək məcburiyyətində qalıb. Bu rəqəmləri eyni zamanda erməni tarixçi A. Lalayanın həmin dövr ərzində Azərbaycanlı əhalinin 80-90% azalmağının qeydə alındığı tədqiqatları da təsdiqləyir.", -deyə təqdimatda qeyd olunur.
Axundov, eyni zamanda, inanılmaz geosiyasi paradoksa diqqət çəkib.
"Ermənistan fəxarətlə özünü monoetnik dövlət adlandırır, halbuki onun ətrafında olan ölkələrin hamısı çoxmillətli ölkələrdir və orada müxtəlif etiqad və mədəniyyətlərdən olan insanlar tarixən sülh və barışıq şəraitində yaşayıblar", - deyə politoloq vurğulayıb.
