İlon Mask şirkətlərində "Apple" məhsullarını qadağan edə bilər.

Gündəmtv.Az xarici KİV-ə istinadla xəbər verir ki, "Apple" hər olduğu kimi, süni intellekt və digər sahələr yenilikləri paylaşıb.

Şirkətin süni intellekt sahəsindəki ən böyük yeniliklərindən biri də lazım gəldikdə “Siri” ilə söhbət robotu "ChatGPT"yə daxil ola biləcəyini elan etməsidir.
Lakin bu yenilik elə də xoş qarşılanmayıb.

"ChatGPT" inteqrasiyası səbəbiylə istifadəçi məlumatlarının "OpenAI" şirkəti ilə paylaşılacağı iddialarına görə, bir çox insan sosial media platformalarında "Apple"ı tənqid edib.

ABŞ-li biznesmen İlon Mask da "Apple"ın "ChatGPT"nin tərtibatçısı "OpenAI" ilə əməkdaşlığına etiraz edib.

O, belə bir inteqrasiya baş tutduğu təqdirdə "Apple" cihazlarının şirkətlərində qadağan ediləcəyini bildirib. Mask şirkətə gələnlərin "Apple" cihazlarını qapıda təhvil verməli olacağını qeyd edib:

"Bu, qəbuledilməz bir təhlükəsizlik pozuntusudur. "Apple"ın öz süni intellektini istehsal edəcək qədər ağıllı olmaması, amma "OpenAI"nin təhlükəsizliyinizi və məxfiliyinizi qoruyacağına əmin ola bilməsi tamamilə absurddur. "Apple" məlumatlarınızı "OpenAI"a təhvil verərkən əslində nə baş verdiyini bilmir" - o deyib.

Qeyd edək ki, "Siri" "Apple"ın iOS əməliyyat sistemi üçün nəzərdə tutulmuş fərdi ağıllı assistent və naviqasiya proqramıdır.