Tatarıstan rəhbəri Rüstəm Minnixanov Rusiyada gündəmə gələn miqrant uşaqlarının məktəbə qəbul edilməməsi məsələsinə sərt reaksiya verib. O bildirib ki, rus dilini bilməyən uşaqların məktəbə buraxılmaması qəbuledilməzdir və belə yanaşma uşaqların hüquqlarına ziddir.

Gündəm24.az xəbər verir ki, Minnixanovun sözlərinə görə, istənilən uşaq qısa müddət ərzində yeni dili öyrənə bilər:

“Necə ola bilər ki, uşağı məktəbə buraxmayasan? O harada olmalıdır? Nə üçün günahkardır ki, dili bilmir? Öyrənəcək. İstənilən uşaq 3-4 ay ərzində hər hansı dili öyrənə bilər. Burada qorxulu heç nə yoxdur. Bunlar sadəcə cəfəngiyyatdır. Bu uşaqdır, o, günahkar deyil”, – deyə Minnixanov vurğulayıb.

Tatarıstan rəhbəri həmçinin qeyd edib ki, məktəb uşaqların inkişafı və cəmiyyətə inteqrasiyası üçün əsas məkandır. Miqrant uşaqları məktəbə gedərək həm dili öyrənir, həm də yerli uşaqlarla sosial münasibətlər qurur. Onun fikrincə, bu, həm uşaqların, həm də cəmiyyətin faydasına olan bir prosesdir.

Minnixanovun çıxışı ölkədə sosial media və ictimaiyyət arasında geniş müzakirələrə səbəb olub. Ekspertlər vurğulayırlar ki, uşaqların təhsildən kənarda qalması onların inkişafına mənfi təsir göstərir və inteqrasiya prosesini gecikdirir.

Səmra İSMAYIL,
Gündəm24.az

Oxunub: 41