Azərbaycan əsilli tanınmış iş adamı, Rusiyanın nüfuzlu milyarderlərindən biri olan Qod Nisanov yenidən gündəmə gəlib. Məlumata görə, o, oğlunun toy mərasimini bu dəfə Azərbaycanda — Qubanın Qırmızı Qəsəbəsində keçirəcək. Toy avqustun 22-də baş tutacaq və ölkənin ictimai-siyasi həyatında tanınan, nüfuzlu simaların da dəvət olunduğu bildirilir.

Gündəm24.az xəbər verir ki, Qırmızı Qəsəbədə keçiriləcək möhtəşəm toy üçün artıq geniş hazırlıq işlərinə start verilib. Mərasimdə yüksək səviyyəli təşkilatçılığın həyata keçiriləcəyi, milli adət-ənənələrə uyğun məqamların da diqqət mərkəzində olacağı gözlənilir. Bu toyun həm də ölkənin musiqi və incəsənət sahəsində məşhur simaları ilə zənginləşəcəyi vurğulanır.

Xatırladaq ki, Nisanov ailəsinin ilk toy mərasimi avqustun 17-də Rusiyada təşkil edilmişdi. Moskvanın ən dəbdəbəli məkanlarından birində keçirilən həmin mərasimdə də çoxsaylı qonaqlar iştirak etmiş, media tərəfindən geniş işıqlandırılmışdı. İndi isə toyun ikinci mərhələsinin doğma Azərbaycanda keçirilməsi həm simvolik, həm də ictimai baxımdan mühüm hadisə kimi dəyərləndirilir.

Qeyd edək ki, Qod Nisanov təkcə biznes fəaliyyəti ilə deyil, həm də müxtəlif xeyriyyə layihələri və diaspor işində fəallığı ilə tanınır. Onun ailəsinin bu toyu da Azərbaycanda böyük maraq doğurub və ölkənin ictimai həyatında əlamətdar hadisələrdən biri kimi qiymətləndirilir.

Səmra İSMAYIL,
Gündəm24.az

Oxunub: 86