Ermənistanın Baş naziri Nikol Paşinyan çıxışı zamanı ölkəsinin sülh siyasəti, regional kommunikasiyalar və Azərbaycanla sərhəd məsələlərinə toxunub. O bildirib ki, Ermənistan heç vaxt revanşizm siyasətinə qapılmayacaq və gələcəkdə də belə cəhdlərə qarşı çıxacaq.

Gündəm24.az xəbər verir ki, Paşinyan bəyanatında sülhün qorunmasının vacibliyini vurğulayıb: “Biz bu sülhü möhkəmləndirməli və qorumalıyıq. Bu, bizim gündəlik borcumuzdur”, – deyə o, bildirib. Baş nazir həmçinin qeyd edib ki, regionda kommunikasiya xətlərinin açılmasından öncə dövlət sərhədinin dəqiqləşdirilməsi, delimitasiya və demarkasiya məsələlərinin həll olunması zəruridir.

Paşinyan Ermənistanın gələcəkdə beynəlxalq kommunikasiya şəbəkələrinin mühüm hissəsinə çevriləcəyini də xüsusi vurğulayıb: “Ermənistan ərazisindən beynəlxalq dəmir yolları, avtomagistrallar, boru kəmərləri və elektrik xətləri keçəcək. Ermənistan qlobal kommunikasiya xəritəsində önəmli ölkələrdən birinə çevrilir”, – deyə o, qeyd edib.

Baş nazir həmçinin Azərbaycanla bağlı diqqətçəkən açıqlama da verib. O bildirib ki, ərazilər məsələsi qarşılıqlı yanaşma əsasında həll edilməlidir: “Azərbaycanın nəzarətində olan Ermənistan torpaqları olduğu kimi, Ermənistanın nəzarətində olan Azərbaycan əraziləri də mövcuddur. Həll yalnız qarşılıqlı yanaşma və ədalətli delimitasiya prosesi çərçivəsində mümkündür”.

Səmra İsmayıl,
Gündəm24

Oxunub: 218