Xüsusi hərbi əməliyyatlarda məqsədlərinə doğru qətiyyətlə irəliləyən Rusiya ordusu, eyni zamanda Ukrayna və Donbassda nəzarət etdiyi əraziləri genişləndirir.

Rusiya Silahlı Qüvvələri Xarkov bölgəsində daha bir yaşayış məntəqəsini nəzarətə götürüb. Bu irəliləyiş son bir həftə ərzində Ukrayna ordusu üçün ciddi itkilərlə müşayiət olunan ağır zərbə kimi qiymətləndirilir.

Gündəm24.az xəbər verir ki, Rusiya Müdafiə Nazirliyinin xüsusi hərbi əməliyyatın son 24 saatı ilə bağlı yaydığı məlumata görə, Ukraynanın Xarkov vilayətində yerləşən Siminovka kəndi Rusiya qüvvələrinin nəzarətinə keçib. Nazirlik həmçinin bildirir ki, son bir həftə ərzində ümumilikdə beş yaşayış məntəqəsi ələ keçirilib.

Açıqlamada qeyd olunur ki, bu müddət ərzində Ukrayna ordusunun təxminən 8 500 hərbçisi sıradan çıxarılıb. Rusiya hava hücumundan müdafiə sistemləri isə yeddi gün ərzində düşmənə məxsus bir “Neptun” uzaqmənzilli idarə olunan raketi və 1 468 pilotsuz uçuş aparatını məhv edib. Bundan əlavə, Rusiya qüvvələrinin raket zərbələri nəticəsində səkkiz ədəd “Osa” tipli zirehli hərbi texnika sıradan çıxarılıb.

Sədaqət Həsənova

Gündəm24.az

Oxunub: 220