İsrail Müdafiə Qüvvələri Yəmənin paytaxtı Sənə yaxınlığında yerləşən enerji infrastrukturu obyektinə zərbə endirdiyini açıqlayıb.

Gündəm24.az xəbər verir ki, ordu rəsmilərinin məlumatına görə, hədəf husilərin nəzarətində olan “Haziz” elektrik stansiyası olub. Bildirilir ki, əməliyyat Yəməndən İsrail istiqamətində raket və pilotsuz uçuş aparatları ilə həyata keçirilən hücumlara cavab olaraq təşkil edilib.

Yəmən mediası partlayış nəticəsində stansiyada generatorların sıradan çıxdığını, bölgədə elektrik verilişində fasilələrin yarandığını yazır. Yerli sakinlər də Sənənin cənubunda güclü partlayış səsləri eşidildiyini bildiriblər.

Əməliyyatın İsrailin Hərbi Dəniz Qüvvələrinə məxsus gəmilərdən atılan raketlərlə həyata keçirildiyi vurğulanır.

Səmra İsmayıl,
Gündəm24.az

Oxunub: 59