“WhatsApp”ın qurucuları Jan Koum və Brian Acton bu gün texnologiya dünyasında uğurun simvolu kimi tanınır. Halbuki onların hekayəsi imtinadan və çətinliklərdən başlayıb.

1976-cı ildə Kiyevdə doğulan Koum ailəsi ilə ABŞ-a köçəndə sosial yardım kartları ilə dolanırdı. Gənclik illərində proqramlaşdırmaya maraq göstərdi və “Yahoo!”da işləyərkən Brian Actonla tanış oldu. Onlar illərlə təcrübə topladıqdan sonra şirkətdən ayrılıb yeni ideya axtarışına çıxdılar.

Səyahətdən qayıtdıqdan sonra hər ikisi “Facebook”da iş üçün müraciət etsə də, qəbul edilmədilər. Bu rədd cavabı onların taleyini dəyişdi: 2009-cu ildə “WhatsApp” ideyası yarandı. Əvvəlcə sadə status tətbiqi idi, lakin “push notification” sistemi tətbiqi qlobal mesajlaşma vasitəsinə çevirdi.

2014-cü ildə “Facebook” “WhatsApp”ı 19 milyard dollara satın aldı. Bu, texnologiya tarixinin ən bahalı müqavilələrindən biri oldu. Koum və Acton üçün əsas şərt istifadəçi gizliliyinin qorunması və reklamsız platforma fəlsəfəsinin saxlanılması idi.

Sonrakı illərdə “Facebook”la gizlilik məsələsində fikir ayrılıqları yarandığından hər iki qurucu şirkətdən ayrıldı. Brian Acton hətta 850 milyon dollarlıq opsiyadan imtina edərək prinsipial mövqeyini nümayiş etdirdi.

Bu hekayə bir daha sübut edir ki, uğur bəzən imtinalardan başlayır. “WhatsApp” sadəcə bir tətbiq deyil, həm də sadəlik və gizlilik üzərində qurulan bir biznes fəlsəfəsidir.
Gündəm 24.az

Oxunub: 431