Netanyahu fələstinliləri Qəzzadan deportasiya etmək üçün gizli planını Nazirlər Kabinetinə açıqlayıb və bir ay vaxt verib.

Gündəm 24.az “Milliyyet”ə istinadən xəbər verir ki, İsrailin baş naziri Benyamin Netanyahu cümə axşamı yüksək səviyyəli müdafiə rəsmiləri və kabinet üzvləri ilə görüşündə fələstinlilərin Qəzza zolağından “könüllü köçü” məsələsini qaldırıb. Görüşdə iştirak edən rəsmilərdən biri “The Times of Israel”ə bildirib ki, məsələ ətraflı müzakirə olunub.

İclasda müzakirə edilən planda qəzzalıların oktyabr ayından başlayaraq hava və dəniz yolu ilə tərk etməyə məcbur edilməsi nəzərdə tutulur. Planın gələn həftə İsrailə səfər edəcək ABŞ dövlət katibi Marko Rubio ilə də müzakirə ediləcəyi gözlənilir.

İsrailin miqrantların qəbulu ilə bağlı bir neçə Afrika ölkəsi ilə danışıqlar apardığı bildirilir . Kanal 13-ün məlumatına görə, Cənubi Sudan, Liviya, Uqanda və Somaliland ilə danışıqlar aparılsa da, hələlik razılıq əldə olunmayıb.

İclasda ifrat sağçı maliyyə naziri Bezalel Smotriç hər hansı ölkənin qaçqınları qəbul edəcəyinə şübhə ilə yanaşaraq, "Onlar bir il ərzində geri dönsələr, planın investisiya dəyəri olmayacaq" deyib. Netanyahu, bununla belə, planın çox baha başa gəlməyəcəyini və onun reallaşmasının lazım olduğunu vurğulayıb.

Oxunub: 364