İranda yayılan Denge qızdırması Ərdəbil əyalətinin Azərbaycanla sərhəddə yerləşən Biləsuvar rayonuna çatıb. İranın Səhiyyə nazirliyi əhalini məlumatlandırıb ki, xüsusi ağcaqanad növü ilə yayılan virus bütün ölkə ərazisinə yayılıb və hətta göydələnlərin ən yüksək mərtəbələrində belə uçmaq və xəstəliyi ötürmək qabiliyyətinə malikdir.

Proqnozlar göstərir ki, payız fəslində yağıntılar artdıqca, infeksiyanı yayan ağcaqanadların sayı artacaq. İranın bir neçə əyalətində yayılan və bir neçə nəfərin ölümünə səbəb olan Denge qızdırması kabusa çevrilməkdədir.


Niyə ağcaqanadlar bəzi insanları digərlərindən daha çox sancır?

Artıq sərhədlərimizə qədər gəlmiş Denge qızdırmasının Azərbaycanda da yayılma ehtimalı varmı?

Gündəm24.az xəbər verir ki, İnfeksionist Mərdan Əliyev Bizim.Media-nın sualını cavablandıraraq bildirdi ki, xəstəliyin Azərbaycanda da yayılması ehtimalı var. Lakin bu yayılma qısa müddət ərzində baş verə bilməz:

“Çünki virusu yayan ağcaqanad növləri hazırda Azərbaycanda mövcud deyil. Onun yerləşməsi, çoxalması, yayılması üçün uzun müddət lazımdır. İqlim dəyişikliyi yaranarsa, bir neçə onillik sonra Azərbaycana gəlməsi mümkündür”.

Mütəxəssis diqqətə çatdırdı ki, bu xəstəlik koronovirus kimi hava-damcı yolu ilə yoluxmur. Bunun yoluxması üçün vektor, yəni xüsusi ağcaqanadlar lazımdır:

“Flavivirus adlanan viruslar xüsusi növ ağcaqanadlar tərəfindən yayılır. Necə ki bizdə bir müddət əvvəl anofelis növlü ağcaqanad malyariya yoluxdururdu, Denge virusu da onun kimidir. Hazırda Azərbaycanda malyariya xəstəliyinə rast gəlinmir, demək olar ki onun nəsli ölkədə kəsilib. Bu virusu yayan ağcaqanadların Azərbaycanda yoluxduruculuq qabiliyyəti üçün ona uyğun şərait: nəmli mühit, bataqlıq, subtropik iqlim şəraiti olmalıdır”.

Qeyd edək ki, xəstəliyin ilkin əlamətləri yüksək hərarət, halsızlıq, sümük və əzələ ağrıları, baş ağrılarıdır. Ağırlaşmalar zamanı qanaxmalar olur və daxili orqanlarda, eləcə də dəridə özünü göstərir. Buna görə də Denge qızdırması hemoragik xəstəliklər (qansızmalarla müşaiyət olunan) sinfinə aid edilir.

Oxunub: 312