Bəzi ölkələrdə peşəkar hərbçilərin xidmət müddəti başa çatdıqdan sonra dövlət tərəfindən işlə təmin olunması proqramları mövcuddur. Məsələn, İsrail və Rusiyada hərbçilərə işlə təminat, təlim və təhsil imkanları təqdim edilir. Azərbaycanda isə bu model hələ rəsmi şəkildə tətbiq olunmur. Bəs, Azərbaycanda bu model tətbiq oluna bilərmi?

Gündən24.az xəbər verir ki, mövzu ilə bağlı Konkret.az-a açıqlama verən ehtiyatda olan polkovnik Rövşən Məhərrəmov bildirib ki, Azərbaycanda da belə bir proqramın hazırlanması vacibdir:

“Dövlət qurumlarında işlə təminat məsələsi sovet dövründə daha geniş idi. Hazırda isə şirkətlər və holdinqlərin əksəriyyəti özəl sektora aiddir və dövlətin bütün hərbçiləri işlə təmin etməsi real görünmür. Lakin Rusiyada qəbul olunmuş qanuna əsasən, hərbi qulluqçular xidmətdən sonra həm dövlət, həm də özəl qurumlarda işlə təmin olunurlar. İsraildə də daim müharibə şəraiti olduğundan, ordudan tərxis olunanlar müxtəlif sektorlarda iş imkanları əldə edirlər. Azərbaycanda isə bu istiqamətdə hələ ki, rəsmi qanun yoxdur”.

Polkovnik hesab edir ki, bu məsələ gələcəkdə orduya stimul yaratmaq üçün xüsusi diqqət mərkəzində saxlanılmalıdır:

“Azərbaycan müharibədən çıxmış dövlətdir və bu gün də bir çox problemlər hissə-hissə həll olunur. Təxris olunmuş hərbçilərin işlə təminatı da vacib addımlardan biridir. Qanun qəbul edilməli və proqram hazırlanaraq həm dövlət, həm də özəl sektor üçün icbari qaydada tətbiq olunmalıdır. Əks halda, icra etməyənlər ciddi cəzalandırılmalıdır”.

Onun sözlərinə görə, hazırda bəzi dövlət qurumlarında, Gömrük Komitəsi, Daxili İşlər Nazirliyi və digər strukturlarda hərbi xidmət keçməyən vətəndaşlar işə qəbul edilmir:

“Bu, müsbət haldır və bütün qurumlara tətbiq olunmalıdır. Ancaq xəstəlik və ya ailə vəziyyətinə görə xidmətə cəlb olunmayanlara şamil edilməməlidir. Əgər vətəndaş xidmətdən yayınmayıb, təxris olunub evinə qayıdıbsa, mütləq şəkildə işlə təmin edilməlidir”.

Oxunub: 108