ABŞ-ın keçmiş milli təhlükəsizlik üzrə müşaviri Con Bolton Alyaskada keçirilən Putin-Tramp görüşünü şərh edərək bildirib ki, danışıqlar Rusiya prezidentinin xeyrinə nəticələnib.

Gündəm24.az xəbər verir ki, Boltonun sözlərinə görə, ABŞ lideri Donald Tramp konkret nəticələr əldə etməyib və yalnız yeni görüşlərə dair vədlərlə kifayətlənib.

“Tramp heç nə qazanmadı, sadəcə yeni dialoq raundlarının vədlərini aldı. Putin isə, mənim fikrimcə, münasibətlərin bərpasında xeyli irəliləyiş əldə etdi. Bu isə onun əsas məqsədi idi. O, sanksiyalardan yayınmağı bacardı və atəşkəs elan etmək məcburiyyəti ilə üzləşmədi”, – Bolton qeyd edib.

Bolton həmçinin əlavə edib ki, növbəti görüşün tarixi hələ müəyyən edilməyib, Ukrayna prezidenti Vladimir Zelenski isə mətbuat konfransına qədər görüşün detallarından xəbərdar olmayıb.

“Proses hələ yekunlaşmayıb, amma mənim qiymətləndirməmə görə, Putin demək olar ki, bütün hədəflərinə çatdı, Tramp isə çox az uğur qazandı. Və bir məqamı da əlavə etmək istəyirəm: Tramp görüşdə son dərəcə yorğun görünürdü. Mən onun məyus yox, məhz yorğun olduğunu nəzərdə tuturam. Bu isə gələcək üçün düşündürücü məqamdır”, – deyə ABŞ-ın keçmiş rəsmisi vurğulayıb.

Səmra İSMAYIL,
Gündəm24.az

Oxunub: 37