"Ölkəmizdə əmlakın sığortalanması mövcuddur və arzu olunandır ki, bütün əmlak növləri sığortalansın. Çünki baş verə biləcək hadisələrdən, qəzalardan, yanğınlardan qorunmaq üçün sığorta çox vacib şərtdir".

Gündəm24.az xəbər verir ki, bunu Demokrat.az-a açıqlamasında Azərbaycan Qiymətləndiricilər Cəmiyyətinin sədri, iqtisadçı ekspert Vüqar Oruc deyib.

O bildirib ki, evlərin tikintisi normativlərə uyğun həyata keçirilməlidir:

"Normativlərə görə tikililər arasında müvafiq məsafə saxlanmalıdır. Bu, həm hər hansı bir təhlükə yarandıqda müvafiq xidmətlərin hadisə yerinə vaxtında yaxınlaşmasına imkan verir, həm də şəhərsalma prinsiplərinə uyğun olaraq şəhərin ümumi mənzərəsini qoruyur. Təəssüf ki, bəzi hallarda bu qaydalara əməl olunmur. Hazırda isə normativlərə ciddi şəkildə riayət olunması tələb edilir və dövlət qurumları bu məsələni nəzarətdə saxlayır.

Evlər arasında məsafənin olması insanların təhlükəsizliyi baxımından son dərəcə əhəmiyyətlidir. Məsələn, bir evdə dağıntı və ya yanğın baş verərsə, yaxınlıqdakı evə zərər vurma riski azalır. Bundan əlavə, yanğınsöndürənlərin müdaxiləsi üçün də bu məsafə vacib şərtdir".

Ekspert deyib ki, sənəd məsələsinə gəldikdə, normativlərə uyğun tikilməyən evlərə sənəd verilməməlidir:

"Amma bəzi hallarda müxtəlif yollarla sənəd alan evlərə rast gəlinir. Bu baxımdan Fövqəladə Hallar Nazirliyinin təhlükəsizlik nəzarəti üzrə qurumları daha ciddi mövqe sərgiləməli, ictimai nümayəndələrlə birlikdə komissiyalar yaradaraq bu halları müəyyənləşdirməli və qanuna uyğun tədbirlər görməlidirlər.

Təkcə həyət evlərində deyil, çoxmərtəbəli binalarda da oxşar problemlər mövcuddur. Elə binalar var ki, onların həyətinə yanğınsöndürənlərin daxil olması mümkün deyil. Belə vəziyyətlər gələcəkdə baş verə biləcək hadisələr zamanı böyük faciələrə səbəb ola bilər. Bu səbəbdən də normativlərə uyğun olmayan evlərin tikintisinə yol verilməməlidir. Əgər artıq tikilibsə, onlar ya normativlərə uyğunlaşdırılmalı, ya da bu mümkün deyilsə, sökülməlidir.

Unutmaq olmaz ki, ölkəmiz, xüsusilə də Bakı şəhəri seysmik fəal zonada yerləşir. Proqnozlara görə, yaxın gələcəkdə güclü zəlzələ baş verə bilər. Bu səbəbdən vətəndaşların təhlükəsizliyini təmin etmək üçün qabaqlayıcı tədbirlərin görülməsi vacibdir".

Oxunub: 49