"Ölkəmizdə həm ümumtəhsil məktəblərinə, həm də məktəbəqədər təhsil müəssisələrinə, o cümlədən bağçalara qəbul üçün elektron sistem tətbiq olunur. Məqsəd aydındır: insanlarla birbaşa təmasın azalması, süründürməçiliyin qarşısının alınması və vətəndaşların maraqlarının qorunması. Elektron sistem həmçinin vətəndaşlarda məmnunluq yaradır".

Gündəm24.az xəbər verir ki, bu sözləri Demokrat.az-a açıqlamasında deputat Vüqar İskəndərli deyib.

"Bununla belə, sistemin operativliyi bəzi çətinlikləri də ortaya çıxarır. Hələ də bəzi vətəndaşlar elektron sistemdən istifadə zamanı çətinlik çəkirlər. Digər tərəfdən, insanlar xüsusilə öz yaşadıqları ünvana yaxın və ya tanınmış, uğurlu nəticələri olan bağçalara uşaqlarını qəbul etdirmək istəyirlər. Bu zaman qəbul kvotasından artıq müraciətlərin olması problemi meydana çıxır və nəticədə narazılıq yaranır. Hər bir bağçanın müəyyən qəbul limiti var və bu limiti aşmaq mümkün deyil".

O bildirib ki, bəzi valideynlər isə uşaqlarının müəyyən bağçalarda qəbul olunması üçün alternativ yollar axtarırlar:

"Bu zaman bağça rəhbərliyi məsələyə cəlb olunur və Təhsil Nazirliyinin diqqətində olur. Problemli hallarda bağça rəhbərləri işdən azad edilir və tənbeh olunur. Hər hansı bir problem aşkarlandıqda dərindən araşdırma aparılır və ədalətli yanaşma təmin olunur.

Vətəndaşlara heç bir fərq qoyulmamalıdır. Əsas məqsəd uşaqların öz yaşadıqları ünvana yaxın bağçalara qəbul edilməsidir. Bu yanaşma bir çox problemlərin qarşısını alır və valideynlərin tələblərinə cavab verir".

Deputat deyib ki, dövlətin siyasəti burada əsas rol oynayır:

"Şəffaflıq təmin edilməli, bağçalarda düzgün tərbiyə və təlim prosesi, keyfiyyətli qidalanma, həmçinin tərbiyəçilərin və müəllimlərin təhsili və təcrübəsi ön planda olmalıdır. Bu istiqamətdə artıq müəyyən işlər görülür və görülməkdə davam edir.

Sistem dərhal nəticə verən bir proses deyil; görülən işlərin bəhrəsi bir müddət sonra, bir neçə il sonra görünür. Bağçalara dövlət tərəfindən kifayət qədər diqqət göstərilir və Təhsil Nazirliyi bu sahədə aktiv fəaliyyət göstərir. Zaman-zaman ortaya çıxan problemlərin isə qaynağı tapılıb həll olunmalıdır ki, gələcəkdə təkrarlanmasın. Bu məsələlər hazırda Təhsil Nazirliyinin prioritet və praktik fəaliyyət sahələrindən biridir".

Qeyd edək ki, son zamanlar bağçalara qeydiyyatla bağlı narazılıqlar artıb.

Oxunub: 53