"İnsanların gündəlik olaraq sürətli qidalanmaya üstünlük verməsi onları “fast food” kimi tanınan qidalardan istifadəyə vadar edir. Lakin bu cür məhsulların qəbulu zamanı qida təhlükəsizliyi baxımından diqqət edilməli bir sıra məqamlar mövcuddur".

Gündəm24.az xəbər verir ki, bunu Demokrat.az-a açıqlamasında "Refresh Group" MMC adlı Qida təhlükəsizliyi üzrə konsaltinq xidmətləri göstərən şirkətin Baş İcraçı Direktoru Seymur Qafarov deyib.

O, bildirib ki, ilk növbədə, istehlakçı məhsulun üzərindəki etiketi diqqətlə oxumalıdır:

"Əgər məhsul mal ətindən hazırlanıbsa, mütləq baytarlıq şəhadətnaməsi ilə, toyuq ətindən hazırlanıbsa, ekspertiza aktı ilə tanış olmaq vacibdir. Bu, “Qida təhlükəsizliyi haqqında” Qanunun 17.2-ci maddəsində də qeyd olunur".

Onun sözlərinə görə, əgər məhsulda kəskin və qeyri-təbii qoxu, rəng və ya dad hiss olunarsa, həmin məhsul alınmamalı, şikayət dərhal satıcıya bildirilməlidir:

"Əgər problem həll olunmazsa, Azərbaycan Respublikasının Qida Təhlükəsizliyi Agentliyinin “1003” qaynar xətti və ya İqtisadiyyat Nazirliyi yanında İstehlak Mallarının Ekspertizası üzrə quruma müraciət edilməlidir. Bu, istehlakçı hüquqlarının qorunması barədə Qanunun 15-ci maddəsində təsbit olunub".

Ekspert bildirib ki, dönər hazırlanarkən sellofanla bişirilməsi yolverilməzdir:

"Sellofan yalnız məhsulun xarici təsirlərdən qorunması üçün qablaşdırmada istifadə olunmalıdır. Ən düzgün üsul -35°C-də şoklanmış məhsulun -18°C-də saxlanması, daşınması və istifadə zamanı soyuducuda +5°C-də defrost olunaraq bişirilməsidir. Bu qaydalara əməl olunarsa, zəhərlənmə, qusma və ishal kimi hallar qarşısı alınacaqdır".

Qeyd edək ki, "Əcəmi" metrostansiyası tərəfdəki “Şaurmacı Murad Usta” adlı dönərxanada ətin sellofan paketdən çıxarılmadan bişirilməsi müzakirələrə səbəb olub.

Oxunub: 28