"Qəhvə mövzusu bir qədər mübahisəli məsələdir. Bəzən insanlar yalnız onun faydalı tərəflərinə fokuslanır, zərərli təsirlərini nəzərə almırlar. Qəhvə həqiqətən də insanın yorğunluğunu azaldır, əhval-ruhiyyəni yüksəldə bilir, beyni oyaq və aktiv saxlayır, müəyyən güc verir. Lakin mütəmadi və nəzarətsiz istifadə asılılıq yarada bilər".
Gündəm24.az xəbər verir ki, bu sözləri SİA-ya açıqlamasında qida eksperti İlkin Şirinov deyib.



Onun sözlərinə görə,əgər gün ərzində davamlı olaraq qəhvə qəbul olunursa, bu, beyində yorğunluq siqnallarını bloklayır: "Nəticədə beyin artıq yorğunluq hissini vermir və qəhvə həyatın ayrılmaz bir hissəsinə çevrilir. Beləcə, asılılıq yaranır və zamanla bir fincanla başlayan vərdiş üç,dörd,beş fincana qədər yüksəlir.Qəhvədən asılılıqdan qurtulmaq isə zaman və iradə tələb edir. İstifadə dayandırıldıqda yorğunluq, yuxusuzluq, əsəbilik və sinir pozuntuları müşahidə oluna bilər. Buna görə də tədricən – 5 fincandan 3 fincana, 2 fincana salaraq bu vərdişi azaltmaq daha sağlam yanaşmadır.Xüsusilə hamilə qadınlarda və uşaqlarda qəhvənin mütəmadi istifadəsi ciddi fəsadlara səbəb ola bilər. Qəhvədəki kofein ürək-damar sisteminə təsir göstərir, təzyiqin yüksəlməsinə səbəb ola bilər və bu da sağlamlıq üçün risklidir. Məşhur deyimlə desək, “hər şey öz qədərində gözəldir”. Qəhvənin gündəlik, dozaya uyğun istifadəsi daha səmərəli və təhlükəsizdir. Lakin qəhvə günə başlamaq, naharda içmək və gecə saatlarında – xüsusən də yatmazdan 6 saat əvvəl qəbul edilməməlidir. Əks halda yuxu rejimi pozular, bu isə əsəb sisteminə mənfi təsir göstərər.Sonda qeyd etmək olar ki, qəhvəni yalnız rahatlıq məqsədilə, normada qəbul etmək daha məqsədəuyğundur".

Oxunub: 737