Son aylarda Azərbaycanın daşınmaz əmlak bazarında müşahidə olunan qiymət artımları ictimaiyyətin və investorların diqqət mərkəzindədir. Xüsusilə Bakının mərkəzi və bəzi ətraf rayonlarında mənzil qiymətlərində əhəmiyyətli yüksəliş qeydə alınıb.

Mövzu ilə bağlı Ölkə.Az-a danışan daşınmaz əmlak məsələləri üzrə ekspert Elnur Azadov bildirib ki, ümumiyyətlə, daşınmaz əmlak sektorunda 2021-ci ildən başlayaraq bu günə kimi 55 faiz artım qeydə alınıb.

Onun sözlərinə görə, daha çox artım ilkin bazarda, yəni tikinti şirkətləri tərəfindən çıxarılan əmlaklara şamil olunur:

“Ən çox qiymət artımı ölkədə “Sea Breeze” ərazisi və “Ağ şəhər” ətrafında oldu. Əgər ölkə üzrə yüksək göstərici 55 faiz qeydə alındısa, bu ərazilərdə 100 faiz artım oldu. 2025-ci ilin göstəricilərinə görə, yenə də qiymət artımı davam edir. Orta hesabla ilin sonuna kimi 10 faiz ən azı qiymət artımı proqnoz olunur. Bu da şəhərsalma ilə bağlıdır. Şəhərdə yeni tikilməyə başlayan tikililərin sayı məhdud olduğuna görə, tikinti şirkətləri arasında rəqabət azdır. Rəqabət azlığından tikinti şirkətləri də qalıq mənzillərin qiymət artımında maraqlıdırlar. Bu da ümumi daşınmaz əmlak sektoruna əks təsir edir”.

Ekspert qeyd edib ki, eyni zamanda, ipoteka predmetləri ilə bağlı müraciətlərin sayı çoxalıb: “Daimi davam edən qiymət artımı ipoteka müraciətlərinin sayını çoxaldır. Ümumilikdə daşınmaz əmlak sektorunda belə iqtisadi vəziyyətə görə qeyri-uyğun olmayan bahalaşma davam edib.

Kirayə mənzil sektorunda da vəziyyət oxşardır. Qiymətlərin artım tempi azalmır. Daha çox qiymət artımı şəhərin mərkəzi hissəsində bir-iki otaqlı mənzillərdə olur.

İlin sonuna kimi nə kirayədə, nə də satışda qiymətlərin düşməsi proqnoz olunur. Hətta belə deyərdim ki, şəhərdə 194 dənə binanın sökülmə ehtimalı var. Onlar qəzalı vəziyyətdə olan binalardır. Bu binaların sökülməsi qısa zaman ərzində baş tutsa, məsələn ilin sonuna kimi kirayə bazarına daha mənfi təsir edəcək”.