Alıcıları ən çox narahat edən məsələlərdən biri də meyvə-tərəvəzlərin əvvəlki dadını verməməsidir.
Ümumiyyətlə, son illərdə yetişən meyvə-tərəvəzlərin böyük əksəriyyəti tamsız və dadsızdır. Bu isə alıcıları qane etmir. Xüsusilə pomidor və xiyarda buna daha çox rast gəlirik. Üstəlik, dadı olmamasına rəğmən pomidor-xiyar yüksək qiymətə satışa çıxarılır.
Ümumiyyətlə, nə üçün pomidor-xiyar başda olmaqla, meyvə-tərəvəzlərin dadı yoxdur?
Mövzu ilə bağlı qida məsələləri üzrə ekspert İlkin Şirinov Hit.az-a açıqlama verib. O bildirib ki, meyvə-tərəvəzlərin dadsız olmasına rəğmən, baha qiymətə təklif olunması zaman-zaman müzakirə predmetinə çevrilir:
"Bəli, meyvə-tərəvəzlər əvvəlki dadı vermir. Bunun da əsas səbəbi onların mövsümündən əvvəl süni şəkildə yetişdirilib satışa çıxarılmasıdır. Nəzərə almaq lazımdır ki, belə meyvə-tərəvəzlər istixana şəraitində yetişdirilir.
Yetişdirilmə zamanı da müxtəlif azot gübrələrindən istifadə olunur. Orada temperaturu saxlamaq üçün xüsusi istilik verən cihazlar quraşdırılır. Bu istixana şəraitində yetişdirilən meyvə-tərəvəzlərə xərclənən enerjinin, istifadə olunan gübrələrin və işçilərin pulu qiymətin üzərinə gəlir. Bu da qiymətlərin baha olmasına səbəb olur".
Ekspert qeyd edib ki, bazarda meyvə-tərəvəzin baha olmasının digər səbəbi də işbazlardır:
"İşbazların bazarlardakı fəaliyyəti də nəzərə alınmalıdır. Ən böyük problem satış məntəqələrinin birbaşa təsərrüfat sahibləri ilə əlaqə qurmamasıdır. Arada olan işbazlar məhsulu kəndçidən və ya hansısa təsərrüfatdan alır, müəyyən bir müddət sonra isə öz istədiyi qiymətə satır.
Məsələn, hansısa topdansatış mərkəzində gələn pomidor, xiyar və ya digər tərəvəzləri bir adam alır. Beləliklə, məhsul bir adamın əlində cəmləşir. Sonra isə istəyi qiymətə pərakəndə satış məntəqələrinə satır".
İlkin Şirinov pomidor-xiyar qiymətlərindən də söz açıb:
"Bu gün satışda 3-5 manata pomidor var. Hərçənd ki, mövsümündə kilosu 1 manat olur. Xiyarın kilosunu 2 manat 50 qəpiyə alırıq. O da mövsümündə satılan məhsuldan xeyli bahadır. Bundan başqa, belə məhsulların dadı da olmur. Çünki süni şəkildə yetişən meyvə-tərəvəzlər günəş enerjisi ilə yetişənlərin dadını verə bilməz.
Bəlkə də hazırda bir çox sahədə pomidor-xiyar əkilməyib. Lakin istixanalarda pomidor-xiyar yetişir və satış məntəqələrinə çatdırılır. Bu isə ciddi problemdir".
