Paytaxt bazarlarında artıq qarpız və yemişin satışına rast gəlmək mümkündür. Hərçənd məhsullar bazara təzə gətirilir deyə qiymətləri də yüksəkdir. Buna baxmayaraq, satıcılar alıcılıq qabiliyyətinin yaxşı olduğunu bildirirlər.

Bəs mövsümi olmayan qarpızın orqanizmə hansı zərərləri ola bilər?

Qida mütəxəssisi İlkin Şirinov "Operativ Media"ya açıqlamasında bildirib ki, mövsümündən öncə yetişən meyvələrin, tərəvəzlərin insan orqanizmi üçün heç bir faydası olmur:

"Çünki hazırda satışda olan qarpızlar süni iqlim şəraitində, süni yaradılmış istixanalarda, müxtəlif örtük altında yetişdirilir və xüsusilə bunların yetişdirilməsi üçün gübrələrdən həddindən çox istifadə olunur. Bu da insan orqanizmi üçün birmənalı şəkildə təhlükə yaradır. Ən əsası qarpız alarkən onun içərisində olan müxtəlif zolaqlar var ki, onlara diqqət yetirmək lazımdır. Belə ki, həmin zolaqlar ağ iri zolaq formasında olduqda, həmin qarpız insan sağlamlığı üçün təhlükə mənbəyi sayılır. Çünki müxtəlif meyvə-tərəvəz üçün nəzərdə tutulan gübrələrin həddindən artıq istifadə olunması birbaşa insanların sağlamlığının riskə atmaq deməkdir. Mən alıcılara tövsiyə edirəm ki, hər bir meyvə və tərəvəzin mövsümündə yeyilməsinin tərəfdarı olsunlar. Qarpızın yeyilməsi hələ bir aydan sonra üçün nəzərdə tutulmuş olsa da, artıq ticarət obyektlərində baha qiymətə müştərilərə təklif olunur və onlar da heç bir sorğu-sual etmədən rahatlıqla istehlak edirlər".

Sevinc İbrahimzadə