Antalya Diplomatik Forumunda keçirilən müzakirələr zamanı Azərbaycan xarici işlər naziri Ceyhun Bayramov Ermənistan xarici işlər naziri Ararat Mirzoyanın sülh danışıqları ilə bağlı səsləndirdiyi əsassız fikirlərini alt-üst edib.
Gündəmtv.Az xəbər verir ki, Forum çərçivəsində "Cənubi Qafqazda regional əməkdaşlıq üçün çağırışlar və imkanlar" mövzusunda keçirilən panel müzakirəsində Azərbaycan, Gürcüstan və Ermənistan XİN başçıları iştirakı ediblər.
Mirzoyan çıxışı zamanı yenə də İrəvanın sülh sazişinə hazır olduqları barədə riyakarlığı nümayiş etdirərək, dayanıqlı sühə mane olan əngəllərin aradan qaldırılması istiqamətində konkret addımlar atmaqdan yayınıb.
Debat zamanı Bayramov bildirib ki, Mirzoyanın Ermənistan Konstitusiyası ilə bağlı təqdim etdiyi əsaslandırmalar Bakının narahatlığını aradan qaldırmır.
“Ermənistanın Müstəqillik Bəyannaməsində Azərbaycan ərazisinin bir hissəsinin Ermənistana birləşdirildiyi və Ermənistan Konstitusiyasında bu bəyannaməyə istinad edildiyi bildirilir, sülh sazişi bir çox məsələləri həll edir, lakin sülh sazişində hansı beynəlxalq öhdəliklər təsbit olunsa da, ölkənin Konstitusiyası və referendumla qəbul edilmiş aktlar istisna olmaqla, onun daxili qanunvericilikdən daha yüksək hüquqi qüvvəsi var”, - Bayramov qeyd edib.
Əlavə edib ki, əgər konstitusiya məsələsini həll etmədən yalnız sülh müqaviləsi üzərində dayanmağa çalışsaq, o zaman bu müqavilə ölkənin əsas qanunlarına zidd olduğu üçün ilk gündən etibarsız olacaq: “Ermənistan əhalisi qonşularına qarşı ərazi iddialarına son qoymağa hazırdır, ya yox?”
Bayarmovun arqumentinə tutarlı cavab tapa bilməyən Mirzoyan aidiyyəti olmayan məsələni ortaya atmaqla cavab verməyə cəhd edib: “Konstitusiyamızın Preambulasında Müstəqillik Bəyannaməsi nəzərdə tutulur, lakin hüquqi nöqteyi-nəzərdən Müstəqillik Bəyannaməmizin Konstitusiyanın mətnində hərfi sitat gətirilən müddəaları hüquqi əhəmiyyət kəsb edir və məcburi qüvvəyə malikdir.
Ötən ilin sentyabrında Konstitusiya Məhkəməmiz belə qənaətə gəlib ki, delimitasiya bəyannamə əsasında baş verir.
Orada göstərilir ki, bizim sərhədlərimiz Sovet İttifaqı dağılan zaman Sovet Respublikaları arasında mövcud olan sərhədlərdir. Bu müqaviləni imzalasaq, razılaşma ratifikasiya prosesi çərçivəsində Ermənistanın Konstitusiya Məhkəməsinə göndəriləcək. Əgər Konstitusiya Məhkəməmiz bir daha deyirsə ki, bu sənəd Konstitusiyamıza uyğundur, o zaman məsələnin həllinə dair əlavə sübuta ehtiyac yoxdur”.
Qeyd edək ki, Mirzoyanın belə bir mövqe sərgiləməsi, bir daha İrəvanın sülhdən yayındığını sübut edən faktdır.
