"Suriyada baş verən son hadisələr Türkiyənin mövqeyini xeyli gücləndirdi və Türkiyə artıq qonşu ölkədə hakimiyyətin ötürülməsi prosesinə rəhbərlik etmək, orada böyük rol oynamaq baxımından böyük məsuliyyət, böyük yük götürmək baxımdan ciddi sərmayə qoydu. Lakin Türkiyə Cənubi Qafqazda eyni rolu oynamaqda, regiondakı proseslərdə eyni intensivlik və həcmdə birbaşa iştirak etməkdə maraqlı deyil".
Gündəmtv.Az xəbər verir ki, bu fikirləri erməni ekspert Ruben Safrastyan Suriyada baş verən proseslərin Cənubi Qafqaz regionuna necə təsir edəcəyi və Türkiyənin iştirakının nə dərəcədə böyük olacağı sualına cavab verərkən deyib.
“Cənubi Qafqazda vəziyyətin pisləşməsini görmək indi Türkiyənin maraqlarına uyğun deyil. Bu strateji məsələyə daha geniş prizmadan baxsaq, qeyd etmək lazımdır ki, Yaxın Şərq mühüm geosiyasi dəyişikliklər dövrünü yaşayır. Bu dəyişikliyin də əsas mahiyyəti ABŞ-nin Yaxın Şərq regionundan geri çəkilməsidir. Türkiyə Amerika tərəfi ilə fəaliyyətini koordinasiya edib lazımi dəstəyi alaraq, bu boşluğu doldurmağa çalışacaq. Bununla qənaətə gəlmək olar ki, Türkiyə Cənubi Qafqazda vəziyyəti daha da gərginləşdirərək hiperaktiv rola can atmayacaq”, - Safrastyan bildirib.
Ekspert əlavə edib ki, Türkiyənin son illərdə Ərdoğanın rəhbərliyi altında strateji məqsədi Türkiyəni dünyanın mühüm qərar qəbul edən ölkələrindən birinə çevirməkdir. Ərdoğan Türkiyəni qlobal oyunçuya çevirməyə çalışır.
“Türkiyə hazırda Cənubi Qafqazda mövqelərinin möhkəmlənməsi, həmçinin Ermənistan-Azərbaycan razılaşması ilə sənədləşdirilməsi və Azərbaycana faydalı olması nəticəsində yaranan status-kvoda maraqlıdır. “Düşünürəm ki, Türkiyə yaxın gələcəkdə burada gərginliyin artmasını və ya yeni müharibənin başlamasını istəməz”, - o qeyd edib.
Son vaxtlarda Azərbaycanın Ermənistana qarşı təzyiqlərini şərh edən ekpsert bildirib ki, Bakının əsas məqsədi Ermənistana təzyiq edib daha böyük güzəştlərə nail olmaqdır. "Ona görə də Ermənistana təzyiq göstərmək üçün davakar ritorikadan istifadə edir. Lakin mən əmin deyiləm ki, bu ritorika Ermənistana qarşı real müharibəyə əsaslanır, çünki ritorika ilə reallıq fərqli şeylərdir. Amma müharibə ssenarisi də istisna deyil”, - deyə ekspert bildirib.
Safrastyanın fikrincə, Türkiyənin Cənubi Qafqazda Rusiya və İranla qarşıdurma yaratmaq istəyi yoxdur. "Ankara hazırda əldə etdikləri ilə kifayətlənir. Baxmayaraq ki, gələcəkdə öz mövqelərini gücləndirməyə cəhd göstərməsi mümkündür.
Türkiyə sadəcə olaraq başqa, daha böyük oyunlarda iştirak edir. Rusiya, İran və Türkiyə əsrlərdir bölgəmiz uğrunda mübarizə aparır və maraqlı təsadüf nəticəsində hər üçü Cənubi Qafqazda vəziyyətin kəskin şəkildə pisləşməsinə qarşıdır”, - o vurğulayıb.
