Moskva qarnizonu Hərbi Məhkəməsi iş adamı Telman İsmayılovun keçmiş mühafizəçisi Tarxan Eldukaevin 2006-cı ildə müğənni Avraam Russoya qarşı təşkil olunan sui-qəsddə günahsız olduğunu tanıyıb.

Bununla yanaşı, Eldukaev iş adamları Qurşumovlara qarşı sui-qəsddə iştirakına görə təqsirli bilinib.

Gündəm24.az xəbər verir ki, bu barədə hüquq-mühafizə orqanları TASS-a məlumat verib.

Məlumata görə, məhkəmə Eldukaevi Rusiya Cinayət Məcəlləsinin müvafiq maddələri ilə təqsirli sayıb. Lakin Avraam Russoya sui-qəsd epizodu üzrə bəraət alıb.

Proses zamanı prokuror Eldukaevin bütün ittiham məqamları üzrə günahkar bilinməsini tələb etsə də, müdafiə tərəfi onun günahsızlığını sübut etməyə çalışıb.

İttihamların detalları

İstintaq materiallarına əsasən, 2006-cı ildə Telman İsmayılov şəxsi ədavət zəminində Avraam Russounu aradan götürmək qərarına gəlib. O, mühafizəçisi və etibarlı adamı Eldukaev vasitəsilə killerlər tutub. 19 avqust 2006-cı ildə muzdlu icraçı Mixail Demkin Moskvada, Plyuşix küçəsində yerləşən binanın qarşısında avtomatla ən azı altı dəfə atəş açaraq Russoya və onu müşayiət edən mühafizəçiyə atəş açıb. Müğənni yaralansa da, vaxtında tibbi yardım göstərildiyi üçün həyatını xilas edə bilib.

Bundan başqa, istintaq müəyyən edib ki, hələ 1996-cı ildə Telman İsmayılov “Çerkizov bazarı”nda baş vermiş torpaq münaqişəsi zəminində iş adamı Tair Qurşumovun aradan götürülməsi üçün Eldukaevə tapşırıq verib. Elə həmin il dekabrın 23-də naməlum şəxs Qurşumov qardaşlarına atəş açıb. Hücum nəticəsində qardaşlardan biri ölüb, digəri isə ağır yaralanıb.

Bu iş üzrə Vitali Cjura və Aleksey Trəsnikov daha əvvəl Avraam Russoya sui-qəsddə iştiraklarına görə məhkum olunublar. Demkin isə istintaq zamanı dünyasını dəyişdiyi üçün onunla bağlı cinayət təqibi dayandırılıb.

Hazırda beynəlxalq axtarışda olan Telman İsmayılov və digər şübhəlilər barədə istintaq davam edir.

Mövlam RZALI,
Gündəm24.az

Oxunub: 146