Vaşinqton görüşündən bir müddət keçməsinə baxmayaraq, Azərbaycanla Ermənistan arasında sülh danışıqları prosesi yenidən diqqət mərkəzindədir. Uzun illərdir davam edən gərginlik və münaqişə fonunda tərəflərin dialoqa açılması və sülhə doğru addımlar atması həm beynəlxalq ictimaiyyətin, həm də region ölkələrinin marağındadır.
Hazırda sülh prosesi nə yerdədir?

Gündəm24.az KONKRET.az-a istinadən xəbər verir ki, globalinfo.az-a danışan politoloq Oqtay Qasımov bildirib ki, Azərbaycanla Ermənistan arasında sülh müqaviləsinin mətninin razılaşdırılması artıq baş tutub:

“Vaşinqtonda ABŞ Prezidenti Donald Trampın iştirakı ilə müqavilə ratifikasiya olunub. Bu, prosesdə mühüm nəticədir. Həmçinin həmin tədbirdə həm XİN rəhbərlərinə, həm də digər müvafiq qurumların səlahiyyətli şəxslərinə sərhədlərin demarkasiyası və delimitasiyası, həmçinin kommunikasiya xətlərinin açılması ilə bağlı tapşırıqlar verilib.

Kommunikasiyaların açılması ilə bağlı İrəvanla Vaşinqton arasında məsləhətləşmələr davam edir. Delimitasiya və demarkasiya məsələləri üzrə isə xüsusi komissiya artıq fəaliyyət göstərir və müvafiq görüşlər keçirilir”.

Politoloq qeyd edib ki, hazırda sülhə mane olan əsas detal Ermənistanın konstitusiyasıdır:

“Düşünürəm ki, bir neçə gün öncə Nikol Paşinyanın xalqa müraciəti çox əhəmiyyətli idi. Bu, faktiki olaraq onun ilk dəfə açıq şəkildə mövqeyini ifadə etməsi deməkdir və sülh prosesinin irəliləməsi üçün mühüm addımdır. Paşinyan Ermənistan cəmiyyətini sülhə hazırlamağa çalışır. Gələn il keçiriləcək seçkilərdən sonra konstitusiyanın dəyişdirilməsi mümkün ola bilər. Son on gündə Ermənistanda ən önəmli hadisə məhz Paşinyanın xalqa müraciəti oldu.

Bu prosesin qarşısında durmağa çalışan xarici qüvvələr də var, lakin ABŞ faktoru onların təsirini zəiflədib”.

Oxunub: 57