“Birincisi, onu deyim ki, ilk dəfədir, tam proporsional sistem üzrə keçirilən bu seçki yaxşı təşkil olunmuşdu, yüksək seçici fəallığı vardı. Biz məntəqələrdə olduğumuz müddətdə kobud qanun pozuntusuyla rastlaşmadıq”.
Gündəmtv.Az xəbər verir ki, bunu deputat Sahib Alıyev parlamentin bu gün keçirilən iclasında Gürcüstandakı parlament seçkiləri ilə bağlı çıxışı zamanı deyib.
O əlavə edib ki, müxalifət isə "12 stul" filmindəki Ostap Bender sayağı “xaric bizə kömək edəcək, Qərb bizimlədir” mənitiqi ilə davranaraq seçkiyə lidersiz, dağınıq və hazırlıqsız qatılmışdı.
“Ona görə də Natali Luazo kimi yaxşı tandığımız rasist ünsürlərin seçki başa çatar-çatmaz onun nəticəsinin saxtalaşdırıldığı haqda açıqlamalarının nəyə dayandığını anlamaq olmur.
Biz yaxşı bilirik ki, bu regionda bölücü xətlər çəkmək istəyənləri “Gürcü Arzusu”ndan narazı salan onların milli dəyərlərə üstünlük vermələrinə, Azərbaycan kimi müstəqil siyasət yeritməyə və öz ölkələrinin beynəlxalq subyektliyini artırmağa çalışmalarıdır”, - deputat bildirib.
Avropa Parlamentinin qəbul etdiyi qətnaməyə toxunan deputatın sözlərinə görə, bu, həmən qurumdur ki, 1988-ci ildə Qarabağın Ermənistana birləşdirilməsi haqda qətnamə qəbul etmişdi: “Bu qətnamələr göstərir ki, Qərbdə bəziləri 1878-ci ildə Berlin konqresində hay məsələsi qaldırılandan hansı niyyət güdülürdüsə, eyni niyyəti güdürlər. Sadəcə unudurlar ki, indi 21-ci əsrdir və cənab Prezidentin təbirincə desək, Azərbaycan bütün ssenarilərə hazırdır”.
