Ramiz Mehdiyevin siyasi təsir imkanları ilə bağlı müzakirələr fonunda parlamentdə mümkün “təmizlik işi” məsələsi gündəmə gəlib. Maraqlıdır, Mehdiyevin dəstəyi ilə deputat olanların mandatı əlindən alına bilərmi?

Gündəmtv.az KONKRET.az-a istinadən xəbər verir ki, Ramiz Mehdiyevin siyasi təsir dairəsi ilə bağlı gündəmə gələn müzakirələr fonunda onun dəstəyi ilə parlamentə düşmüş deputatların mandatının ləğv olunması ehtimalını araşdırıb. Məsələ ilə bağlı ekspertlər fərqli mövqelər sərgiləyiblər.

Azad Vətən Partiyasının sədri Akif Nağı bildirib ki, Ramiz Mehdiyev uzun illər ərzində müxtəlif dövlət qurumları və ictimai-siyasi strukturlarda öz adamlarını yerləşdirməyə çalışıb və buna qismən nail olub:

“Mehdiyev həm hakimiyyət daxilində, həm də ondan kənar strukturlarda özünü möhkəmləndirməyə çalışırdı. Onun dəstəyi ilə parlamentə düşənlərin olması da istisna deyil. Bunu sübut etmək çətin olsa da, müəyyən rəhbər orqanlar əyri yolla ora düşənlərin kimliyini bilir. Ona görə parlamentdə təmizləmə işləri aparılmalı, əgər onlar Mehdiyevin antimilli fəaliyyətində iştirak ediblərsə, cəzalandırılmalıdır. Ümumilikdə isə yeni parlament seçkilərinə ehtiyac var”, – deyə A. Nağı vurğulayıb.


Hüquq müdafiəçisi Novella Cəfəroğlu isə tam əks mövqedən çıxış edib. Onun sözlərinə görə, hazırkı mərhələdə deputatların mandatının əlindən alınması məsələsi gündəmə gətiriləcək qədər əsaslı deyil:

“Mən hesab etmirəm ki, bu gün buna ehtiyac var. Əlimizdə ciddi əsaslar yoxdur. Bir də Milli Məclisdə kifayət qədər ağıllı insanlar var ki, onlara cavab verməyə hazırdırlar”, – deyə N. Cəfəroğlu bildirib.


Beləliklə, məsələnin hüquqi və siyasi müstəvidə müzakirəsi davam edir və hər iki tərəf prosesin müxtəlif aspektlərini diqqətə çatdırır. Parlamentin buraxılması və yeni seçkilərin keçirilməsi isə hələlik yalnız ekspert rəylərində səslənən təklif olaraq qalır.

Oxunub: 167